MPSC kal zel dan tur?

MZP chuan Mizoram Public Service Commission (MPSC)-in MCS Combined Competitive Examination 2023 an buatsaih dan leh sorkar hna dang thawk tur an lâk danah thil fel lo a awm ngei nia an hriat avangin MPSC Chairman báng turin an phût a; hei vang hian MPSC-a thawkte pisa kái tur an dang.

Mizoram sorkar pawhin MPSC hi chhui zui deuh a ngaiin a hria a ni ngei ang a, chhui chiang turin MPSC Chairman leh Mizoram Chief Secretary lo ni tawh ruat a ni.

Tun hnaia MPSC thil tih dante chhui chiang tura ruat Inquiry Officer hian dik takin, ṭan bik leh duhsak bik nei loin a chhui turah ngai ila; thil nihna dik tak pawh chhui chhuak ngei se a duhawm hle. Tunah chuan mipui tan thu dik tak hriat a harsa a, hriat hleih theih pawh a ni lo. Chuvangin, Inquiry Officer hi a pawimawh hle a; a pawimawhzia hriain IO pawhin dik tak, chak tak sia a chhui a ngai a ni.

MZP-te hian thil ṭha tam tak an ti tawh a, an la ti zel pawhin a rinawm. Chutih rualin, mi tam tak rilruah anmahni rinhlelhna a awm ve fo bawk. Tute'n emaw an mawng an hiat a, an kaihbû-ah an ṭang emaw, 'issue' siam hrim hrim tumna emaw vang a nih chuan a pawi hle ang.

Zirlai pawlte'n an puhna hi a dik emaw, dik lo emaw, tunah chuan Mizoram mipuiin thu dik kan hriat miau loh avangin MPSC hi a mualpho rih chu a ni phawt mai a; a chunga rinna nghah dan pawh mi tam takah chuan a tlahniam tawh hial ang. A pawi hle.

Puh an nihna hi a dik a nih phei chuan a pawi lehzual dawn a; Mizo ṭhalai, Mizoram mipui, ram leh hnam pawi khawihna a tling ang. Mipui rinkaia MPSC siam leh tur chuan hun a duh fé mai thei. MPSC kal zel dan turah hian thuneitute'n fimkhur tak leh uluk taka thil an tih a ṭul ngei dawn a ni.