Silent period ngaih pawimawh

Mizoramah naktuk April 19 hian Lok Sabha inthlanpui neih a ni dawn ta a, inthlan campaign hun pawh nimin tlai dar 5 khan a tâwp a, silent period a ni mek.

Election Commission of India-in dan a siam angin, silent period chhungin political party-te leh an candidate-te chu engti zawng pawha an campaign phal a ni tawh lo a; media hrang hrangah, social media-ahte thlengin inthlan campaign-na lam thil reng reng tihchhuah khap a ni.

Silent period bawhchhiate chu kum hnih thleng lung-ina tàntir emaw, lei chawitir theih a ni a; a pahnih hmanga hrem ve ve theih a ni bawk.

Election Commission-in dan leh inkaihhruaina a siamte hi political party leh candidate zawng zawngin an zawm tur a ni a, bawhchhiat tura duan a ni lo. Chuvangin, dan zawm mai hi khua leh tui ṭha nihna leh dan anga hremna pumpelhna a ni.

Silent period hi mainstream media kan tih - TV-te leh chanchinbu lamah chuan zawm a hlawh viau zel a; social media-ah erawh chuan zawm a hlawh lo ṭhin. Tuna silent period kal mekah pawh social media hrang hrangah campaign-na thu theh darh te, party dang leh candidate-te sawichhiatna thil a darh leh nualin a rinawm.

Social media-a campaign-na thil leh party/candidate dangte sawichhiatna thil a awm leh awm loh thuneitute lamin vil ve bawk mah se, a tak taka bawhzui leh dan ang taka chêt a har hlein a rinawm a. Chuvangin, party worker-te leh mipui náwlpui hi kan insûm a ngai a ni. Dan bawhchhetu ni bik lo turin insûm ila, i inthunun hrâm hrâm ang u.