BPL dik tak

Planning department chuan thuchhuah siamin, ṭanpuina beisei avangin below poverty line (BPL)-a inkhung mai mai a rem tawh dawn lo an ti a; "BPL ni si lo, BPL-a awm tum hi thil zahthlak a nih dawn," an ti a; Mizoram sorkarin official data leh statistics rintlak dik ruahman turin chak taka hma an lak mek thu sawiin, "Official data dik leh rintlak neih hi policy mumal tak siam a nih theih nan leh kan ram dinhmun dik tak kan hriat theih nan leh hmasawnna kawng zawh nan a pawimawh. He hna atan hian Mizoram mipui zawng zawng lungrual taka kan thawhho a pawi-mawh," an ti.

BPL kan hmelhriat hmasak dan a fuh tawk loh avangin Mizoramah BPL kan kalpui dan pawh a dik lo a, a pawi hle. Hei vang hian mirethei tak tak zawk (BPL) pawhin an phu ang duhsakna leh chhawmdawlna an dawn loh phah a, an chanai ṭhenkhat hi BPL ni tak tak lote'n an dawn ve zel vang a ni. BPL tak tak chin chuan ṭhenawm khawvengte rual an pawl phak meuh lo tur a nihlaiin Mizoramah chuan BPL-a inziak lut, ṭhenawmte neih ang nei ve thei vek hi mi tam tak an awm a, a zahthlak hle a ni.

BPL kalpui dan fuh loah hian mipui lamin mawh an phurh rualin BPL chin thliar tura survey kalpui dan fuh loh vang a ni thei a, sorkar pawhin mawh a phur thui hle. Tunah erawh chuan indem leh in sawiselin awmzia a nei tawh lo a, sorkarin kalphung thar nen official date rintlak zawk neih tumin
ṭan a la ta a, hei hian Mizoram buaina tam tak hi a ching fel thei ngeiin a rinawm.

BPL tur BPL ni si lo chu an tam lo ang a, BPL ni lo pui BPL-a inziak lut erawh tam tak an awm. BPL ni lo tan BPL-te hamṭhatna lo chuhpui hi a zahthlak a, sorkarin a nihna ang tur taka BPL kalpui a tum ta hi a lawmawm takzet a, huaisen takin tihlawhtling ngei rawh se.