Damdawi-in bawlhhlawh sawngbawl

Mizoram Pollution Control Board (MPCB) chuan thuchhuah siamin, sorkar laipuiin damdawi-in bawlhhlawh sâwngbawl dan thar, Bio-Medical Wastes Management Rules, 2016 a tichhuak thar tih an tarlang a; dan thar hian mihring enkawlna damdawi-in leh ran damdawi-inte bakah, vaccination camp, blood donation camp, surgical camp, free clinic leh damdawi-in páwna damlo enna thil tih reng reng a huam dawn a ni.

Mizoramah pawh private damdawi-in a awm ve nual tawh a, khawpui hrang hrangah an intihhmuh chho mek. Mipui mamawhna avang te, doctor chhuak thar an awm belh zel avangte leh ram economy
ṭhang zelin a mamawh (demand) tawh avangin private damdawi-in hi kan la din belh zel dawnin a lang. Heng private damdawi-in zingah hian sorkarin bawlhhlawh a sawngbawl dan tura a phut ang thlapa kal an awm laiin, chutiang ngai pawimawh lem lo pawh an awm.

Sorkar damdawi-inte thleng hian bawlhhlawh sawngbawl danah an la fimkhur lo a, tlemlai deuh khan mihring taksa bung an tanna hnuhmate pawh bawlhhlawh pangnai paihna hmun turah hmuh a ni a, a zialo hle a ni. Damdawi-in thli leh bawlhhlawhte phei chu bawlhhlawh pangngai ang a ni lo a, a hrisel loh theih piah lamah a tenawm bik em em a, a enkawltu lam an fimkhur a ṭul khawp mai.

Private damdawi-in tam zawk hi mihring chen bitna hmunah a ding a, mipui tana pan awlsam turah an din a ni tlangpui. Hetihlai hian a in-a hi damdawi-in atana sak reng te a lo ni vek lo a, a ṭhente phei chu ṭhen-awmte nena insi renga awmte a ni hlawm. Hei vang hian bawlhhlawh sawngbawl dan piah lamah kawng hrang hrangah private dam-dawi-in neitute hi an fimkhur a ngai a,
ṭhenawm khawveng tana hnawksak lo thei ang bera an awm thiam a ngai a, mi tinin an pan khawm a nih tawh avangin an
ṭhenawm hnaia mite tan chuan an hnawksakna chin hi chu a awm lo thei lo ang.

Damdawi-in lo ding hian kawng tam takah ṭhenawm hnaite tan harsatna a thlen sa tawh a, chumi piah lama an bawhlhawlh leh thli vanga harsatna an tawk zui a nih phei chuan a huatthlala hle thei ang. Hei vang hian sorkar damdawi-in bakah private damdawi-in neitute hi fimkhur thar se, danin a phut ang thlapin bawlhhlawhte hi sawngbawl se a ṭha khawp mai.