'Economic molecule' leh kan dinhmun

Mizoram chief minister chuan, Pathianin Mizote ram ṭha tak a pek thu sawiin, "Ram dangin an neih ve loh hausakna kan ramah a awm a, economic molecule-in a khat a ni. Chumi activate chu ka duh a, ka vision a ni. Israel aia a lêt 10-a hausak theihna ram Lalpa'n min pe. Kan ngaihtuahna thlâkthleng chuan heti em em hian a ni maw a lo danglam theih, kan ti ang," a ti a; chu chu a thlen dik a beisei thu sawiin,  "Ṭhangtharte'n, 'Hei a ni maw Pu Zorama vision kha' an la tih ngei Pathian zarah ka beisei. Ram dangte aia a lêta zau leh ṭha Pathianin ram min pe," a ti. 

Mizoram sorkarin state páwna hna­thawk, Covid-19 léng vanga an hna chhunzawm thei loa Mizorama hawte chhawmdawlna tura a duan, 'Livelihood Generation for Returned Migrants Workers Due to Covid-19' tlangzarh ṭuma chief minister thusawi hi eng chiah nge tih hriat fiah vek theih ni lo mah se, kan state hotupa ber thusawi aṭang hian kan ram hian hmabak êng tak a nei niin a lang. 

Hetihlai hian tun hma anga thusawi duah leh ṭawngkam thiamna hmanga mipuite hi hruai hleihtheih a ni ta lo a, tunah chuan ṭhangtharte'n a tak hmuh an duh a, a nihna lo lang chhuak hi an hmu duh ṭhin. Tuna kan state hotupa thusawi pawh hi a tak chang thei a nih ngai chuan fak a hlawh chhunzawm ang a, a tak hmuh tur awm lo thusawi ringawt a nih chuan miin fiamthu thawhna atan an hmang zui palh ang tih hlauhawm tak a ni. 

Engpawhnise kan CM hian ram tan ṭhahnem a ngai a, he ram ṭhatna hi a hmu a, chu chu a taka chantir a duh tih a thusawi aṭangin a hriat theih. A thusawia a ṭawngkam bungraw hman 'economic molecule' tihte hi midangin an hman zen zen loh a nih hmel a, a nihna tak leh a kawh chiah hi  mipui nawlpuiin hre thei rih lo mah ila, he ram hian hmasawn turin theihna a neihzia a sawina a nih hmel a, ṭhahnamngaihna thil a ni ang. 

He ram, rah ṭha chhuah tura theihna nei sang tak nia sawi ṭhin hi tunah chuan India ramah pawh state hnufual pawl a la ni reng a, hmasawn tura khalh ngil theitu ber chu chief minister a ni. CM-in kan ram hi economic molecule-a khat nia a sawi hi hai chhuak a, hlawk taka chhawr zuia state hmasawntir theitu tur chu amah bawk hi a ni a, chief minister-in kan ram hmasawnna a kalpui zel dan tur hi mipuiin an thlir reng dawn a ni.