Vawk hri leng a chhan zawn a ngai

Tun hnaiah Mizoram hmun hrang hrangah vawk pûl hri a leng mek a, Champhai district-a vawk pûl hri leng mek leh vawk thite a hmuna zir chiang turin AH & Veterinary department chuan Rapid Response Team for Disease Outbreak a tír a, vawk hri leng hi PRRS a ni tih finfiah a ni tawh.

Tun hnaiah Mizoramah vawk pûl hri a leng ta zauh zauh a, a pawi hle a ni. Heng vawk pûl hri leng hi Mizoram khaw chhak lam, Myanmar lam hnaih aṭanga inṭan a ni deuh zel a, hei hian ngaih a tiṭha lo hle. Vawk pûl hri hi khawi aṭanga lo lut nge a nih a, eng tia lo lut nge a nih hi chhui chhuah a ṭha khawp mai.

Mizote hi sa ngaina tak hnam kan ni a, vawk sa hi mipui tlanglawnin an ei duh em em a ni a, mi tam tak eizawnna a ni bawk. Vawk vulha eizawng zingah chhungkaw hausa lam an tam lo a, chhungkaw rethei te te an ni hlawm a, heng mite eizawnna nghawng thei thil thleng hi a pawi takzet a ni.

Khuarel chhiatna lo thleng ṭhinte hi a hun sawi lawk theih a ni lo a, a chhan pawh sawi theih a ni ngai lo. Chutiang bawkin mihring leh ran suat thei hri lengte pawh hi eng vanga lo thleng ngawt nge a nih hriat a harsa a, a lo thlen hun leh thlen dan tur hriat lawk ni se inbuatsaih theih tur a ni a, a hriat theih si loh. Tun hnaia vawk pûl hri leng hian chhungkaw tam tak innghahna an vawk talh huna an pawisa hmun tura an ruahmante chu awmze nei loah a chantir zo ta a, a pawi takzet a ni.

He vawk pûl hri hi ngun takin mithiamte hian zir chiang se, Mizorama piang nge hmun dang aṭanga lo lut tihte pawh fiah tum se, ram pawn aṭanga lo lut a nih ngai chuan Mizorama vawk vulha eizawngten harsatna lian zawk an tawh lohna turin vawk lakluh hi tihtawp nghal ni rawh se.