Vote i thlâk ang u le

Parliament (Lok Sabha)-a Mizoram aiawhtu tur thlanna chu vawiin hian neih a ni dawn ta; vote nei zawng zawngin vote thlâk vek thei ila a duhawm hle.

Lok Sabha inthlan awm tawhah Mizoramah vote a tla ṭha ngai meuh lo a, India ram puma vote tla zat chawhrual a pha ngai lo tih theih a ni. Kum 1996 khan 73.41% a tla a, a bâk Lok Sabha inthlan dang zawngah chuan 70% a kai lo vek a, kum 1977-ah phei chuan 49.92% chauh a ni. Inthlan hnuhnung pathumah pawh - kum 2009-ah 51.80%, kum 2014-ah 61.69% leh 2019-ah 63.06% chauh a ni bawk.

Mizoram mipuite'n Lok Sabha inthlan hi state assembly inthlan angin kan ngai pawimawh lo deuh tih a chiang. Vote tla zat hi a hniam mah mah ṭhin niin a lang a; Mizoram tan a zahthlak deuh roh thei ang. Chuvangin, vote a tlâk ṭhat theih nan mipuite'n ṭan la thar ila, vawiina inthlanah pawh vote thlâk i tum vek ang u.

Vote thlâk hlutzia te, vote thlâk thei nih a hlutziate ngaihtuah chiang ila, hre thar ila. Ram hruaitu thlang thei kan ni hi a hlutzia i ngaihtuah chiang ang u. Khawvela ram eng emaw zatah chuan mipui an zalên tâwk lo a, an ram hruaitu tur an thlang thei lo. Chutiang ramah chuan mipuiin an ram hruaitu tur zalên taka thlan theih leh an mi duh tak thlan theih an châk ve hlein a rinawm.

India ramah chuan mipuiin hmasawnna atana ram hruaitu ṭha ni tura kan duhte zalên takin kan thlang thei a, a ropuiin a hlu tak zet zet - mipui kan nihlawh em em a ni. Chuvangin, Parliament-a kan hmangaih Zoram aiawha ding tur kan mi duh tak thlang turin vawiinah hian vote i thlâk ṭheuh ang u. Polling station-ah nangmah nghakhlel em emtu mi eng emaw zat an awm e.