Inthlanpui Zalen leh Muanawm

Mizorama Lok Sabha inthlanpuia vote thlâk chu zawh a ni ta a, buaina leh harsatna lian tham thleng loa zawh a ni hi a lawmawm.

Inthlanpui tluang taka neih a ni te, zalên tak leh râlmuang taka vote thlâk a ni te, intihbuaina ang chi a awm ve lote hi a lawmawm em em a, India rama Mizoram ropuina pakhat a ni a, mipui hi lawm tur kan ni.

Inthlan buaipuitu, thawktu lu ber aṭanga a hnuai ber thlengin an mawhphurhna pawimawhzia hriain, ṭhahnemngai tak leh taima takin an thawk tlang a, a lawmawm a, fak an phú. Campaign laia thu léng velte duhthusam ang vek ni lo mah se, mi tikham uchuak bik ang chi a awm lo niin a lang a, political party-te leh candidate-te an fakawm. MPF, kohhran leh pawl dangte hmalaknate pawh a chhuanawm e.

Kan duh ang leh beisei angin vote a tla ṭha lo a nih pawhin kan inhriatthiam tlân a ṭha. Election hotu te, sorkar official te, political party leh candidate-te bakah, mipui pawhin vote tla ṭha lo hi mi dang dem phah nan hmang lo ila, kan tlin tâwk leh kan theih tâwk a ni tih kan pawm thiam a ngai.

Mizoramah chuan vote thlâk leh vote chhiar inkarah thla khat chuang, ni 45 vel a awm dawn a, rei viau mah se, state danga inthlanna nghah a ngai miau si a, kan hriatthiam tlàn a ngai bawk.

Lok Sabha inthlan zo tawh mah se, social media group tam takah chuan political party mi, thu-hnu dáwn vak loa thil sawi pawp pawp mai ṭhinte chu an la invawm zui viau mai thei. Mahse, chu'ngte chuan awmzia tak tak a nei dawn tawh lo.

Social media-a insawisel chiam te, inchirhtheh vak vakte hi mipui náwlpuiin an hmu ve zel a, an tan ninawm a ni fo. Hun eng emaw chen chu MP inthlan kaihhnawiha invawm zui a, inchirhtheh chiamin awmzia a neih rih dawn chuan loh avangin party worker-te an insûm a ṭha. Social media-a ṭawng tam luatah mualpho theih a ni a, chuvangin fimkhur tlân a ṭha e.