Bawlhhlawh paiha fimkhur

Tunlai hian mi ṭhahnemngaite'n 'Save the Riparian' tih hming vuahin Tlawng lui fintu lui hrang hranga bawlhhlawh, a bikin sarâng lam chi bawlhhlawhte an tifai ṭhin. Ni eng emaw zat an hnatlang tawh a, pawl leh mimal ṭhahnemngaite an thawk chhuak ṭhin a, bawlhhlawh tam tak an thian fai tawh.

Save the Riparian hmanga mi ṭhahnemngaite hmalakna hi a lawmawm tak zet. An hmalakna hian Aizawl mipui tui tlan ber Tlawng lui thianghlimna a thlen ngei a beiseiawm. Chu mai bakah, mipuiah zirtirna awmze ril tak a neih a rinawm a; a hmun loa bawlhhlawh paih mai mai te, a bik takin ṭawih thei lo thilte paih kawngah Mizo mipuiin fimkhur a ṭulzia an hriat phah ngei a beiseiawm hle a ni.

Mizote hi kan changkang ve viau tawh kan intih rual hian, changkan lohna langsar tak kan la nei a, chu chu bawlhhlawh paih danah a ni. Mi tam tak an harh tawh a, bawlhhlawh paih mai mai duh lo mi tam tak an awm tawh. Chutihrualin, duhdah taka bawhhlawh paih mai mai an la tam em em reng tho bawk.

Tunlai thleng hian car ṭha leh nalh tak tak chhung aṭanga khawpui khawlaia bawlhhlawh paih chhuak ta mai mai hmuh tur an la awm reng a, lirthei aṭanga chil chhâk ta maite pawh hmuh tur an la awm zel. Hengte hi a changkang lo em em a, a ṭawp a, a tenawm bawk.

Mi tin, chhungkaw tin hi bawlhhlawh paih chungchangah kan fimkhur lehzual a ṭul em em. Luikawr hnaivaia awm kan nih pawhin luikawrah bawlhhlawh paih mai tawh lo ila, bawlhhlawh báwmah paih hmasain, bawhhlawh paih lirthei a lo kal hunah paih zel tawh ila. A ninawm cháng a awm ang, mahse, i ti hram hram ang u.

Incheina lamah changkang viau mah ila, bawlhhlawh paih danah kan changkàn tel loh chuan changkànna tak tak a tling lo. Mizoram leh kan khawpuite mai bakah, kan lui dungte a lo faia a thianghlim zawk theih nan mi tinin tih theih kan nei a, chu kan tih theih chu kan awmhmun ṭheuh aṭang hian i ti ve ang u.