Thisen pek uar zel a ṭul

Sorkar kum liam ta April 2023 - March 2024 chhungin Mizoramah thisen unit 37,419 pek a ni a, thisen pek zawng zawng zinga unit 34,252 chu pek bik nei loa a thlàwna pek niin, 91.22% a ni.

Record-a a lan danin, kum 2022-23 chhunga thisen pek zat hi a tam thawkhat viau a, a lawmawm a; Mizoram ṭhalai, mi dangte nunna chhanna tura inpete vang a ni.

Thisen pek zat a tam hi a ṭhat tho rualin, pek zat tam hrim hrim aiin thisen mamawhte'n an mamawh hun taka thisen dawn tur an neih a pawimawh zawk a; chutiang tur chuan Mizoram ṭhalaite an ṭan mar zel a ngai.

Thisen hi pek tawh a awm thei lo a, thisen pek tawh hi a hun laia mamawhte'n an hmang a; hun a kal zel a, mamawhtu dang an awm zel a, mamawhtute'n an dawn zel theihna tur chuan petu an awm zel a ngai. Chuvangin, thisen pekah hian pek tawha innghah chi a ni lo a, pek zel ngai a ni. Thisen hi siam chawp theih a nih miau loh avangin miin an mamawh miau chuan petu an awm a ngai.

Thisen pek hi thil ṭha em em, mi nunna chhanna a ni. Thisen pe tawh zingah inchhîr an la awm lo hial àwm e, inchhîr an lo awm mial a nih pawhin chhiar tham lek an ni ang. An inchhîr lo tlangpui a, inchhîr chu sawi loh, an zawngchhang tlangpui zawk. Hei hian thisen pek hi thil ṭha, tih zel chi a ni tih a tichiang a ni.

Mizote hian engtin emawa mite ṭanpui kan duh tlangpui a, inṭanpui mai dan erawh kan hre vek lo. Sum leh paia inṭanpui tur chuan sum neih deuhte a ngai leh zel a, chuvang chuan suma inṭanpui hi mi tam tak tan thil awlái a ni lo. Thisen peka mite ṭanpui tur erawh chuan sum a ngai lo a, taksa hrisel ṭha neih a tâwk. Suma inṭanpui ai mahin a hlu zawk nghe nghe àwm e. Thisen pek hi Mizo ṭhalaite hian uar zel thei ila; miin thisen a pek theih chuan a hrisel ṭha tâwk tihna a ni a, nupui/pasal atan pawh an neih tlâk tihna a ni!