Retailer leh buhfai sem chungchang

Tun hnaiah retailer-te'n kudam aṭangin buhfai an khul loh avangin hmun ṭhenkhatah mipuiin ration buhfai an la thei lo a, buhfai khul duh lo zinga a tam zawk chu Aizawl chhunga retailer an ni. Retailer zingah Food, Civil Supplies & Consumer Affairs (FCSCA) kudam aṭanga buhfai khul/la duh lo an awm thu leh dan dika thil ti tura an tih avangin retailer ṭhenkhatin buhfai an lak duh loh thu FCSCA Minister-in a sawi.

FCSCA Minister sawi danin, danin a phût angin retailer-te chu ePOS (electronic point of sale) device hmanga kut zungpui nemte hnenah chauh buhfai pe tawh tura tih a ni a, khauh zawka kalpui ṭan a ni. ePOS hmang chauha buhfai sem chu retailer ṭhenkhatin an duh lo. Chutih laiin, retailer an nih dawnah ePOS hmang chauha buhfai hralh turin an intiam a ni.

Retailer-te hi mipui rawngbawltu, mipui ni tin mamawh pui ber pakhat kawltu leh hralhtu an ni a, an pawimawhzia an hre chiang hle tur a ni. An pawimawh em avangin mipuiin an tawrh theihna turin thil an ti tur a ni lo a, anmahni hlâwkna tur ngaihtuah luat vangin dan kalhin thil an ti tur a ni lo. Dan loa thil ti leh sorkar thupek zâwm ṭha duh lote chu sorkar hian huaisen takin hrem zel se a ṭha âwm e.

FCSCA department pawh an inenfiah a ngai ang - an mi leh sate zingah dik lo taka thil ti an awm thei. Retailer zingah sorkar dan zâwm ṭha duh lo leh hlemhle taka thil ṭhin an awm rualin, Supply kudam aṭanga buhfai pek chhuah danah thil dik lo a awm thei a; chu chu retailer-te'n dan loa thil an tih bul inṭanna a ni thei bawk.

Retailer-te'n bûk dik thlapa buhfai an dawn ngei theih nan sorkar a inenfiah a ṭul a, thuneitute'n mipui hma ngai tak leh mipui tawrhna a thlen loh nan hma an lâk a ngai. Mipuiin chawa an rin pui ber buhfai hnianghnâr taka an hmuh theih hi sorkar mawhphurhna a ni a, ṭha taka an hmuh reng theih chuan sorkar tan hmingṭhatna pawh a ni ang.