Social media-ah fimkhur zual a ngai

Champhai South leh Champhai North joint VC-te chuan, an huam chhungah thil thleng eng emaw a awmin, media-a tarlan ngai a awm chuan journalist-te hnenah chauh chanchin sawi chhuah tawh an rêl. Journalist-te chuan mipui hriat atana him chin an thlit fîm ṭhin thu leh mi dangte erawh chuan thli fím loa an puanzar mai ṭhin thute an sawi.

Lok Sabha inthlana Saitual district-a lirthei hman man pawisa inpek danah thil dik lo a awm anga Youtube channel pakhatin a puanzar chungchangah April 23, 2024 khan district bawrhsap hoin thuneitute an ṭhukhawm hial a. Mahse, Youtube channel hian an thu puanzar chu an paih leh a, sawifiahna video a tihchhuah leh avangin dan anga hmalak a ni lo.

Mizote'n social media kan hmang nasa tawh hle a, thu dik tâwk lo thehdarh a tam tawh hle. Youtube-ah thu dik tâwk lo puanzar leh dan bawhchhiaa thu leh video thehdarh a awm fo tawh a, thuneitute'n an zilha an vaukhàn leh thubuai neih phah an awm nual tawh. Whatsapp leh Facebook-ah dik famkim loa thu thehdarh te, mi thu dah a dik leh dik loh pawh ngaihtuah loa thehdarh ve leh chhâwnte a tam tawh hle bawk.

Media-a thu dik lo thehdarh leh thlalak bawlhhlawh leh hmuh hrehawm ang chi thehdarh hi dan bawhchhiatna, dan hmanga hremna tawrh theihna a nih avangin mi tin kan fimkhur tak zet a ṭul. Media tih hian, print media, visual media, digital media, social media-te a huam vek.

Print media leh visual media-a thu thehdarhtute hi chu mumal taka training nei tawh, mipui tana him chin thliar thiam an ni tlangpui. Social media-a thu leh thlalak thehdarhtu zinga a tam ber erawh chu media lama inzirna nei lo, mipui tana him leh him lo pawh ngaihtuah lo an ni tlangpui. Hlâwkna tur ringawt thlir loin, dan bawhchhe lo tur leh hrem kan nih loh nan social media-ah hian Mizote kan fimkhur hle a ngai a ni.