Mizorama kuhva chíngtute harsatna

Bilkhawthlir Kuhva Ching Society chuan, dan loa Myanmar aṭanga kuhva tawlhruk vangin kum 2023 chhung khan cheng vbc. 10 vel an hlohah an ngai a, chuvang chuan March 3, 2024 aṭang khan Myanmar kuhva rah tawlhruk an châng ṭhin.

Bilkhawthlira kuhva chíngtute'n kuhva an thar aṭanga sum an hmuh ngei tura ngaih hi a tam tham hle mai a, an khawngaihthlak tak zet. Sum an hloh chhan - Myanmar aṭanga dan loa kuhva tawlhrûk tihtawp a ṭulzia a tichiang hle àwm e.

Bilkhawthlir mai bakah, Vairengte leh Mamit district-a Hachhek bial chhungah kuhva tam tak a awm a, kuhva huan neia eizawnna pui ber atana hmang chhungkaw tam tak an awm. Chu'ng mite pawh chuan Bilkhawthlir khaw mite ang bawkin sum tam tak an hloh ngeiina rinawm.

Hun kal tawhah dan loa kuhva rah tawlhruk a zalen riau hun a awm a, police-te pawhin an lo en liam mai mai tawh ṭhin a, sorkar pawhin mit a lo siai khum tawh a; tawlhrûk ni loin, langsar taka phurh hun lai a awm a ni ber. Tunah erawh tun hma ang em em chuan kuhva tawlhrûk a langsar tawh lo niin a lang a; mahse, man tur a la awm reng avangin a la tawp hmak lo tih a hriat theih.

Kuhva tawlhrûk hi Mizo eng emaw zat chuan uchuak takin an hlâwkpui ngei niin a lang a, mahse, an hlâwkpui dan chu ram dan kalha chêtna a ni.

Chutih laiin, kut hnathawktu tam takin an chhiat phah a, rim taka an thawh rah an seng theih loh phah a, sum tam tak an hloh phah. Kut hnathawktute tawrhna hi sorkar hian en liam mai lo se, ṭha taka an kuhva tharte an hralh ngei theih tawh nan kawng zawnpui se, ṭan lâkpui rawh se. Dan loa kuhva tawlhrûk a tàwp hmak theihna tur pawhin nasa zawkin hma la ngei teh se.