Ramri khâr tumah sorkar muang lo se

Ministry of Home Affairs thupek angin India/Mizoram leh Myanmar ramria inkalpawhnate chu May 1, 2024 aṭangin khâr a ni dawn. Hei hi Mizoram sorkar chuan duh loin, sorkar laipuiah ziaka thlen a tum.

Assam Rifles hotute sawi dan chuan, kumin May ni 1 aṭangin India leh Myanmar inkalpawhnate khâr a ni tawh dawn a; khâr a nih chuan hun bituk chhung aia rei chám turte'n ramria duty-te phalna an lak hmasak a ngai dawn a, phalna la loa chámte chu hrem theih a ni dawn a, Champhai district-a border haat-te pawh khâr vek tur a ni.

A hre zawkte sawi danin, Mizote hi tun hmain India mi kan ni ngai lo a, tuna Mizoram pawh hi kum 1947-a India independence hma chuan India ram a ni lo. Tuna Mizoram/India leh Myanmar ramah duh duha inkalpawh tawnin, pêm tawn foin an awm ṭhin. Mahse, India-in independence a hmuh hnuah Mizoram chu India ramah lutin, Mizote chu international boundary-in a ṭhen ta a ni.

Tuna Mizorama awm zingah Myanmar rama piang mi tam tak an awm a, Myanmar ram mi ni ta zingah pawh Mizoram/India rama piang eng emaw zat an awm. Ram pahnihah hian chhung leh khat, laina hnai tak tak nei mi tam tak an awm bawk.

Hengte avang hian India/Mizoram leh Myanmar-a Mizote hi ṭhen hran hleih theih kan ni lo a, inkalpawh tawn mamawh reng kan ni. Chuvang chuan, zalen taka ramria inkalpawh tawn theih hi kan mamawh hle. Hei hi Mizoram sorkar duh dan pawh niin a lang.

May 1, 2024 aṭangin ramri khâr ni ta se, mi tam takin harsatna an tâwk ngeiin a rinawm a, ngaihthah chi a ni lo. Mizoram sorkar hian ramri khâr a nih lohna tur leh free movement regime tihtawp a nih loh nan; rang zawk leh chak zawkin hma la se, sorkar laipuiah ziaka thlen a tum pawh hi muangcháng lo se. Ramri khâr a nih loh nan state sorkarin a theihna zawng zawngin ṭan la se tih hi Mizo mipui duh dan a ni ngei ang.