Assam inthlang tur nghawng a ni em?

Assam sorkara Additional DGP pakhatin Saihapui-V khuaa Mizo IR police duty-te an awmna hmun chhuahsan tur leh darkar 24 chhunga an chhuah loh chuan an inkah tur thu a sawi avangin, inkap thei turin Mizoram police-te leh mipui an inbuatsaih a; Home minister chuan, ramria Mizo IR sipaite hnuh lêt tumna an la neih loh thu a sawi bakah, 1875-a ramri chu Mizoram sorkarin ramria a pawm a la nih reng thu a sawi.

Mizoram leh Assam hian tun hma deuh aṭang tawhin a khat tawkin ramriah buaina a nei zauh zauh ṭhin a, chutihlaiin a ramri chinfel ni si loin a buaina erawh chinfel a lo ni fo tawh. Tun hnaia buaina leh harsatna thleng pawh hi sorkar laipui an inrawlh chuan a ramri lam ni loin a buaina chin ringawt hi chu thil chinfel harsa tak a nih hmel loh. 

Assam-ah hian kum 2021 kum bul lamah MLA an thlang dawn a, hei vang hian Assam sorkar hian an ramri lamah thawm an rawn nei nia ngaihna lian tak a awm. Assam hian Mizoram nena a inkar ramri awm dan hi a hre vek a, kha chen kha ngaimawh loin a thlir a, tun hnaia hmun khat mai pawh ni lo hmun hrang hranga ramria buaina an rawn siam hi chu tihpalh ni loin tihluih ngei niin a lang. 

Assam mipuiin ramriah buaina an rawn siam lo a, heng ramria awmte hi Assam mi leh sa nghet pawh ni lo pêm khawm leh a state hmangaihna nei tak tak pawh an ni lem lo a, sorkar official zawkin ramri-ah buaina an rawn siam chat chat mai hian thil hi fel taka 'plan' sa vek angin a lantir thei hial mai. 

Mizote chuan kan zavaiin ram hmangaihna tak tak kan nei a, sorkar a ni emaw, NGO a ni emaw, mimal tin pawh ni se Mizoram hi chân kan phal lo a, humhalh turin kan inpeih reng a ni. Hetihlai hian Assam hian ram neih lêt duhna leh ramri buai chinfel tumna vanga heng boruak hi rawn siam ni loin, an inthlang tur vela boruak siamna atan min rawn hmang lek a nih chuan a zia lo hle ang. 

Kan state-a roreltu MNF hi Assam-a roreltu BJP-te nena NDA leh NEDA-a thawkho vek an ni a. Chief minister ve ve hi inbia se heng harsatna awmte hi chinfel theih a nih hmel si a; buaina chinfel mai ni loa a ramri thlenga chinfel hlan hi a nghahhlelhawm tawh khawp mai.