Car loan sum tihchingpen

Mizoram Director General of Police sawi danin, Mizoram Police chuan Mahindra Mahindra Financial Sevice Ltd. kaltlanga car loan cheng vbc. 150 vel tihchingpen chungchang an chhui chhuak a, mi 11 an man. Thubuai engtin nge a kal zel dawn tih sawi lâwk theih ni lo mah se, Mizoram police-te an che ṭha tih theih a ni.

Police-in mi 11 an mante chu Mahindra Mahindra Financial Sevice-a thawkte deuh vek an ni a, a bul tumtu ber, Mizorama area business manager Jakir Hussain pawh man a ni. Chutih laiin, an thawhpui nia lang leh inhnamhnawih anga DGP pawhin a sawi Aizawla car dealer lam mite erawh an man lo thung.

Bank loan leh sum kaihhnawih thil hre zawkte chuan car loan cheng vbc. 150 tihchingpenah hian car dealer-te puihna tel loin loan a kal thei lo a, delivery letter-ah lirthei chassis number leh lirtheia pawimawh dangte ziah lan a ngaih bakah, lirthei thlalak thlengin telh a ngai niin an sawi a; loan pawisa pawh dealer-te account-ah a luh a ngaih thute an sawi bawk.

Hetiang hi thil nihphung a nih chuan, car loan cheng vbc. 150 tihchingpennaah hian car dealer-te thûk takin an inrawlh a nih a rinawm. Chutih laiin, Mahindra Mahindra Financial Sevice lama thawkte leh an mi chhawrte man an nih laia car dealer-te man an nih thu sawi a awm ve si lo hi a mak angreng hle.

Thil sual tihna leh pawi khawihna thuhmuna inhnamhnawihte hi man an ṭul a nih chuan tih bik leh thlei bik awm loin man ni se, tu emaw chunga khawngaihna lantir bik awm lo se. Hemi chungchangah hian Mizoram police-te hi hlauh bik leh dim bik nei loa huaisen taka kal turin mipuiin an beisei ngei ang.