CMO bula Congress ṭhalaite chêt dan

Dubai-a Mizo tleirawl pahnihin harsatna an tawh chungchangah Congress party ṭhalai (MPYCC) mi eng emaw zat chu April 29, 2024 khan Chief Minister's Office gate bulah an pungkhawm a, anmahni lo dangtu police-te nen hun rei vak lo an innawr nghe nghe.

MPYCC-te duh ber hi Chief Minister hnena an duh leh phûtte ziak leh ṭawngkaa thlen a nih hmel a; an hruaitute chu CM office chhungah luhtir niin CM hnenah an duh angte an sawi bakah, ziakin an thlen a ni.

Congress ṭhalaite ṭhahnemngaihna hi a lawmawm a, India ram páwna Mizo ṭhalaite himna an ngai pawimawh hi a ṭha hle. Chutih rualin, CM hmuh an tum dan - mi tam tham tak kala hmuh erawh thil tih âwm tak a ni kher lo mai thei a, CM himna atan pawh thil ṭha a ni lo thei ang. Party/pawl anga langsar taka chêt leh thil eng emaw thlentir hrim hrim tumna angah leh 'issue' siam tumnaah miin an lo ngai a nih pawhin a àwm lo bik lo ang.

Congress party hi kum tam tak CM lo nei tawh an ni a, an chêt dan kha Congress party sorkar laia chêt dan atana an duh bik loh thil a nih a rinawm. Party/pawl anga tam tham taka lungawin lohna lam hawia CMO-a Chief Minister luhchilh hi thil tih chi a ni lo tih pawh hre chiangtu an ni ang.

Mizoram mipui sûkthlêk a inthlâk hret hret a, politics kalphung pawh a inthlâk chho ve zel a. Tun hmaa politics khelh dan kha tunlaiah chuan chîn zui zel a fuh tawh lo thei a; kalphung ṭha zawk, mawi zawk leh changkang zawk, mipuia awmze nei zawk leh mi rilru hneh thei zawk tur political party-te hian an ngaihtuah thiam a ngaiin a rinawm.

Ṭhangthar zawkte phei chuan tun hmaa politics khelh dan ṭhenkhat kha chu an hmu hniam viau tawh mai thei a, rîk hup hup ang chi hi an mil záwng a ni tawh kher lo mai thei. Political party-te hian ṭhangtharte mar dek chungin, an mil záwng taka politics an khelh chhoh a ṭul àwm e.