VC/LC term ennawn a hun em?

Mizoram Upa Pawl chuan April 30, 2024-a Vanapa Hall-a General Assembly vawi 49-naa an rorelah, 'Local council/village council term hi kum 5 ni loin kum 3 ni turin sorkarah thlen ni rawh se,' tiin an rél.

MUP-in VC/LC term chungchang an ngaihtuah daih hi thil inhmeh lo a nihna chin a awm thei ang. Mahse, an rorel leh thutlukna hi sorkar tan ngaihtuah zui tlâk tak niin a lang. VC/LC term khat rei zawng hi titina leh social media velah sawi a awm zauh zauh tawh a, a rei lutuk mah maha ngaitu mi tam tak an awm niin a lang. Chuvang chuan MUP pawhin an ngaihtuah an ngaihtuah ta a nih a rinawm.

Tun hma chuan VC/LC term khat hi kum 3 a ni ṭhin a, kum 2015 aṭang khan kum 5 a ni ta a. Term khat kum 5 a nih hnuah tuna term kal mek hi term hnihna chauh a la ni. Chuti chung chuan, mi tam tak chuan kum 5 term hi a rei lutuk niin a ngai dêr tawh.

VC/LC atana thlan tlinte zingah political party-a inhmang sa, hruaitute pawh ni fé tawh, VC/LC nih châk zawk mi eng emaw zat an awm. Party mi leh sa ni lem lo, khawtlanga mi hmingṭha, mipuiin khawtlang hruaitu atana an thlan duh tur nia hriat vanga political party-te'n an sàwm ngawih ngawih vanga hreh tak chunga pên chhuak ta mi tam tak an awm bawk, a bik takin khawpui lamah an tam.

Khawtlang hruaitute hi mipui sawisel leh dem kai hma tak an ni a, theihtawp chhuahin ṭan lain, thawk ṭha ve viauin inhre ve ṭhin bawk mah se, sawiseltu an awm zel tho. Châk vang leh duh thu rêng ni lo, miin an ngen ngawih ngawih vang leh mi hmaizah vanga pên chhuakte tan VC/LC term kum 5 hi a rei duh viau ang. Tuna VC/LC ni mek zingah pawh ning ngawih ngawih tawh an awm ṭeuhin a rinawm. Chuvangin, sorkarin ngaihtuahna thar a hman a hun a ni ta a ni mai thei.

Nawrtu an awm emaw, awm lo emaw, VC/LC term khat kum 5 ni mek hi a ṭhatna leh ṭhat lohna awm thei zawng zawng sorkar hian ngun takin thlir se; kum 5 hi a rei lutuk a, kum 3 a ṭha zawk dawn a nih chuan thlâk hreh lo se. Chutih rualin, kum 5 hi a la ṭha zawk a nih chuan, VC/LC pawl ni lo, pawl dang daih thu leh titi léng vel ringawt vang mai chuan thlâk danglam kher loin, a ṭha zawk a tihah chuan nghet takin ding tlang se a ṭha ang.