District council-ah sorkar nghet

3rd May, 2024

Hun eng emaw ti chhung Lai Autonomous District Council-ah sorkarna siam thei an awm loh hnuah MNF leh Congress party aṭanga MDC-te'n sorkar siam an tum a, Lawngtlai DC kaltlangin Governor hnenah sorkar an siam theih thu an thlen.

District council-ah sorkar a awm tur a nih laia sorkar siam thei awm loa an awm reng hi a fuh lo a; sorkarna siam thei tura party pahnihte an inbe rem thei hi a lawmawm a, sorkar ṭha tak siam thei ngei se a duhawm.

Mizorama district council pathumah hian sorkar ding lai paih thlâk a awm zauh zauh tawh a, inthlanah eng party-in emaw sorkarna siam theihna khawp MDC neia sorkar an siam pawhin sorkar chu a tlu leh mai ṭhin. Hei hi MDC ṭhenkhatin an awmna party an thlâk ṭhin vang a ni tlangpui. Hmun ṭhenkhatah phei chuan inthlan result puan hnu lawkah, sorkarna siam thei party-in sorkar an siam hma hmaa MDC inchhuhsak a lo thleng tawh ṭhin.

MDC-te'n thlan tlin an nihna party an chhuahsan leh mai ṭhin hi a ṭha lo a, rinawm lohna a ni. MDC an nih theih chhan - candidate-a dahtu party leh thlangtu mipui phatsanna a ni ti ila a dik thawkhat ang.

Parliament leh state assembly-ah chuan party danga inleh khapna dan (anti defection law) a awm a, MP/MLA-te'n thlan tlin an nihna party leh thlangtu mipui kalsanin party dang an zawm mai mai thei lo; party dang an zawm a nih chuan MP/MLA an nihna kalsan a ngai. Hetiang bawk hian district council-ah hian anti defection law hi awm ve thei se, party danga inlet kual an awm ṭhin hi a véng ngeiin a rinawm a, council sorkar leh mipui tan a ṭha zawk ngei ang.

District council sorkar a tlûk fo chhan pakhat chu - political party ṭhenkhat, a bik takin state-a sorkar lai party-in an kherh ṭhin vang niin a lang. State-a sorkar lai party-te hian district council-ah party dang sorkar a ding a nih pawhin ṭha takin kaltir ve mai se, an party sorkartir tumin kherhin thlêm kual vel ṭhin lo se a ṭha hle ang. Tuna sorkar lai ZPM party hian district council sorkar ding lai ṭhiat a, an party sorkartir tumin hma an lâk thâwm a la awm lo niin a lang a, a lawmawm hle a ni.