Kuhva tawlhrûk titàwp tura ṭan lâk

Police leh CYMA Kumpuan Committee-te chuan May 2, 2024 zing khawvar hmain Seling dáiah ram dang aṭanga dan loa lâk luh nia hriat; kuhva rah tam tham tak an man a, Assam Rifles sipaite'n Champhai Zotlangah ip 148 an man bawk. Tun hnaiah dan loa kuhva tawlhrûk man thu hriat tur a awm zauh zauh reng a ni.

CYMA Kumpuan Committee mite chuan, khawchhak lam aṭanga dan loa kuhva rah tawlhrûkte chu Khawzawla check gate an paltlangpui thei tlangpui nia thu an dawn thu an sawi. Hei hi a dik a nih chuan sorkar thuneitute'n an enfiah a ṭul ang.

Tuna sorkar ding mek lâk luh a nih hnu lawkah Home Minister-in ram dang kuhva dan loa Mizorama lâk luh leh tawlhrûk tihtawp thuai tum a nih thu a sawi. Hei hi sorkarin chak zawka a bawhzui a ngai niin a lang.

Kuhva rah tawlhrûk tihtawp hmak chu thil harsa tak a nih a rinawm a, tawlh ru duh an awm chhúng chuan tawlhrûk dan tur kawng thar an zawn ve zel avangin tihtawp hmak a hautak hle ang tih a rin theih.

Chuti chung chuan, tun hnaiah kuhva rah tawlh ru an pung leh ta deuh em maw ni chu tih turin man thâwm a awm leh fo mai. Kum hmasa lama sawi ṭhin - kuhva rah tawlhrûk mantu tur police-te'n an man ṭha duh lo anga sawi ṭhin kha a awm leh a nih chuan sorkar hotute an enfiah a, khauh lehzuala hma an lâk a ṭul ang.

Kuhva tawlhrûkah hian sorkar mi leh sa an inhnamhnawih emaw, man ṭha duh loa kawng an lo sialsak emaw a nih chuan sorkar thuneitute'n an zawn chhuah a, an hrem ngei a ngai. Hei hi kuhva rah tawlhrûk tihtawpna tura pawimawh a ni.

Mizoram hmun ṭhenkhatah kuhva dah khâwmna in (kudam) a awm nual nia sawi awmte pawh hi sorkar thuneitute'n an bawhzui a, tihtawp a nih theih nan hma an lâk a ṭul hle bawk.