Sorkar sum lapse chungchang

MNF party chuan ZPM kaihhruai Mizoram sorkar chu Scheme Special Assistance to States for Capital Investment (SASCI) sum vbc. 200 chuang tikîr (lapse)-ah an puh. Chief Minister erawh chuan a kaihhruai sorkar tih lapse ni loin, MNF-in sorkarna an chan laiin SACSI sum vbc. 433.36 a lapse thu a sawi thung.

Chief Minister sawi danin, MNF-in sorkarna an chelh laiin SASCI Part-I first instalment-ah 75% hna thawh hman a nih loh avangin second instalment hmuh theih a ni lo. Kum 2022-23 ah first instalment vbc. 200 hmuh a ni a, second instalment vbc. 200 hmu thei loin a lapse thung. Kum 2023-24 ah Mizoram hmuh tur vbc. 700 zinga vbc. 466.64 hmuh a nih laiin, second instalment vbc. 233.36 a lapse leh a ni.

Tun hmain sorkar sum hmuh tur, eng emaw vanga hmuh tâk loh, lapse ta a lo awm tawh. Sorkar sum a lapse a ni tih chiang taka hriat theih a awm laiin, mipuiin thu dik an hriat theih loh khawpa inpuh tawnna a lo awm tawh bawk.

Sorkar laipui aṭanga sum hmuh tur hmuh theih tâk loh, sum lapse a awm leh ṭhin hi a uiawm a, mahnia thawh chhuah nei tam lo Mizoram ang tan phei chuan a uiawm lehzual. Tun hnu zelah chuan sum a lapse tawh loh nan sorkarna chelhtu ministry leh sorkar hnathawkte an ṭan lehzual a ngai a ni.

Ministry leh sorkar hnathawkte mai bakah, sorkarna chelhtu party-te leh hna thawktu contractor-te an pawimawh em em bawk. Tuna sum lapse leh ta anga sawi pawh hi sorkarna chelhtu party-te leh hna thawktute chêt chak tâwk loh vang niin a lang a; ṭhenkhat phei chu hlemhlêna nen a inkaihhnawih theiin a lang.

Sum lapse a awm tawh loh nan ram leh hnam hmangaihna tak tak nena chêt a, hna thawh a ngai a; mahni inhaivûr tumna nen chuan a inmil thei lo a ni tih hriat thar leh a ngai a ni.