Sum pûk rulh ngaih pawimawh

Champhai district mi, bank aṭanga loan cheng eng emaw zat la, rûl ṭha leh si lote chu tun hnai khan Securitisation and Reconstruction of Financial Assets and Enforcement of Security Interest Act, 2002 hnuaiah District Magistrate thupekin an in leh ramte chhuhsak an ni.

Sorkar press release leh media lama a lan danin, Champhaiah hian loan rulh ṭhat loh vangin kumin April leh May thlaah ṭum thum in leh ram chhuhsak a ni tawh a; chu'ngte chu in ding lai pariat leh ram/in hmun paruk a ni. In leh ram an chhuhsakte chu cheng vaibelchhe tél hù a ni.

Loan lâkna atana in leh ram dahkham inchhuhsak hial a ngai hi a zia lo hle mai a, Mizo mipuite inenfiahna tur pawimawh tak a ni. Hetiang thil hi tun hnuah thleng tawh lo se a duhawm hle.

Tun hma aṭang tawhin Mizo mipui, bank aṭanga loan late'n an rùl ṭha lo tih hi sawi fo a ni a; bank loan mai bakah, mimal sum inpûktir a, rùl ṭha leh thei si lo pawh mi tam tak an awm niin a lang. Loan leh sum pûk rulh ṭhat loh avangin court-ah pawh thubuai (civil case) a tam hle niin a lang bawk.

Loan lâk te, mi sum pûkte hi mi tam tak chuan an awlsam mah mah niin a lang. Sum pûk chíng laklawh chuan pûk zel mai an hreh lo a, chu chuan harsatnaah a hnûk lut leh nge nge ṭhin. Chutih rualin, loh theih loh thila sum pûk mamawhte pawh a awm theih bawk ang.

Bank emaw, mi dang emaw hnen aṭanga sum pûk hi fimkhur a ṭha a, pûktute'n rulh leh ngei pawh an tum tur a ni a, ngaih pawimawh ber pakhatah an neih a, mutmawh hnàrmawha an neih ngai.

Sûm pûk hi mahni mai bakah mi dangte harsatna lian leh thûk zawka inhruai luhna a ni thei a, thubuai neih theihna a ni. Chuvangin fimkhur a ngai em em a, pûk loa awm theih hrâm hrâm chuan pûk loh a him ber. Sum pûktu chuan a ngaihthah tur a ni lo a, rùl leh ngei turin theihtawp chhuah tur a ni.