Puantah eizawnna

Industries minister H Rohluna chuan tun hnai khan Thenzawla puantahtu mi 90 hnenah puan tahna hmanrua (loom accessory) leh mi 40 hnenah puantah khawl a sem a, hengte hi North East Textile Promotion Scheme (NETPS) sum aṭanga sem a ni. Minister chuan, "Puantahte hi hnûhma mám zawka zo turin theihtawp chhuah ang che u. Look East Policy hi Mizoramah chuan puantahtute baka chhawr tur an awm lo," a ti.

Mizoramah puantah hmanga eizawngtu mi ṭha-hnem tak an awm a, Mizorama puan tah te hi state pawn leh ram pawn thlenga hralh chhuah a ni. Hun eng emaw chen chu puantah tur hian Myanmar lam aṭangin mi an lo chhuk ṭhin a, a bikin kawl mi leh sain Mizoramah puan an tah nasa hle. Tun hnaiah Myanmar-ah politics dinhmun a ṭha chho a, puantahtu tam takte chu an haw chho tawh.

Puantah eizawnna hi Mizo-ram khaw ṭhenkhatah chuan tualchhung miin an thawk a, hmun dang aṭanga puantah thiamte lalut loin a khaw pum eizawnna ang hialin an hmang ve ta a, an entawntlak hle. Tun hnaiah Mizo ṭhalaite zingah puantah eizawnna luhchilh a, chhungkaw chawmna atana hmangtu an pung zel bawk a, hengte hi hmasawnna duhawm tak a ni.

Puantaha eizawngtute hian ṭan an lak thar zel a ngai a, tun aia kuthnu mam leh ṭha zawka hnathawh, hralh chhuah tura mawihnai zawka tuam (packaging), a hralhna tur zau zawka zawn (marketing) an mamawh a; tuna Mizote puantah hi a nihna pangngai reng hian awmze nei zawka buaipui chuan man to zawk leh darh zau zawka hralh theih a nih a rinawm a, mithiam zawkte'n he puantah eizawnna hi luhchilhin ṭan la zel rawh se.