Ram páwna inthawn chhuah leh harsatna

Tun hnaiah United Arab Emirates khawpui Dubai-a Mizo hmeichhiate'n harsatna an tawh chungchangin sawi a hlawh hle. Mi ṭhenkhatin Mizorama sorkar lai mek an dem a, sorkar hotu lamte pawhin thil awmzia an sawifiah ve bawk.

Dubai-a Mizo hmeichhiate'n harsatna an tawh chungchangah hian The Mizoram Private Placement Agencies (Regulation) Act, 2015-in sawi a hlawh viau. He danah hian 'Beyond the boundaries of the state of Mizoram' tih a awm avangin Dubai-a hna thawk tura mi thawn chhuaktu placement agency-te'n thiam lohna an neih bik loh thu Chief Minister-in a sawi.

Congress party ṭhalaite leh mi tam tak erawh chuan dan tlawhchhanah, 'Beyond the boundaries of the state Mizoram' tih awm mah se, India ram páwna inthawn chhuah chu Mizoram sorkar dan siamin a huam theih loh avangin chhuanlam tlingah an ngai lo thung. Heng karah hian min tam tak rilru a insual mek a, thu dik an zawng a ni.

The Mizoram Private Placement Agencies (Regulation) Act, 2015-a 'Beyond the boundaries of the state of Mizoram' tih hian Mizoram páwna hna thawk tur inthawn chhuah a phalsak ngei mai. Mahse, Mizoram páwn ve tho, India ram pâwna mi thawn chhuah erawh chu ziah chian ni lo mah se a huam tel lo a ni tih a chiang nghal mai àwm e, state pakhat dan siamin a huam tel theih loh avangin.

Mizo hmeichhia, Dubai-a hna thawka harsatna tâwk zingah dan bawhchhiatna a awm ngei niin a lang. Passport lem siam tih te, kumtlinglo thawn chhuah an ni tihte hi a dik a nih chuan sorkar hian uluk takin a chhui ngei tur a ni a, dan loa thil titute an phû tâwka hrem an nih theih nan hma a la ngei tur a ni ang.

Harsatna inṭanna hi sorkar hmasa hun lai aṭanga inṭan pawh ni se, sorkar hmasa lamah dan ang taka hmalak a lo ni tawh lo a nih pawhin, tuna sorkar mek hotute hian an mawhah an la ngam tur a ni. Sorkar hmasa demna atan hmang mai loin, harsatna a thlen mek hi sorkarin chinfel dan tur a zawng tur a ni a, dan a kengkawh ngam tur a ni.

Harsatna thleng ṭhin hi placement agency-te thil tih dan sorkarin a vil uluk lehzual a ngai tak zet tichiangtu a ni bawk.