Hri leng avanga inthlan ṭhulh

MNF party thuneitu sang National Core Committee (NCC) tun hnaia ṭhukhawm chuan Covid-19 leng mek avangin block hruaitu tur thlang loa ruat ni se, an ti. MNF party President hoa ṭhukhawm chuan, "Tun thlengin Covid 19 hripui leng nen kan la inchiahpiah mek zel avangin MNF block inthlanna buatsaih pawh a hun tawh viau nain, tun ang dinhmunah chuan inthlanna buatsaih chi-ah kan ngai lo. MNF dan buin NCC thuneihna a pek angin, block hruaitu turte chu a ruata inruat thar mai nise," an ti. 

Mizorama sor­karna vawn fung chelhtu party berin fimkhur nachang hriaa Covid-19 a darh zel lohna tura MNF Block inthlanna an sawn hla hi thil lawmawm tak a ni a, hri inkai darh thei reng dinhmunah kan la awm a ni tih hre chianga hetianga thutlukna finthlak tak an siam hi a lawmawm takzet a ni. 

Tun hnai maiah Mizoramah Village Council leh Local Council inthlanna chu State Election Commission-in a kalpui tawh a, political party hrang hrangin Covid-19 avanga inthlan a la hlauhawm thu an sawi a, chu mai ni loin SEC-ah inthlan sawn hla turin ngenna an thlen bawk. Hetihlai hian MNF chiah hi Village Council leh Local Council inthlan sawn tura ngenna siam ve lo a, kal tlangpui duhtu an ni thung.

Kha inthlan kha hri darh zauna tia puh mai chu a fuh loh theih rualin, inthlan kaih­hnawihah Covid-19 vei tam tak hmuh belh an nih leh takah chuan, mi tam takin kha inthlan neih leh tak kha Covid-19 darh nasat chhanah an puh. Inthlan buai­puitu official-te zingah ngei pawh hri kai hmuh an ni a, an inenkawlnaah sorkarin sum tam tak a sen a ṭul ta a ni. 

Hei vang pawh hi a ni mai thei, mipui nawlpui chet chhuahna tur pawh ni tawh lo, political party pakhat chhunga block level-a inthlang tur ringawt pawh, "Covid 19 hripui leng nen kan la in chiahpiah mek zel avangin MNF block inthlanna buatsaih pawh a hun tawh viau nain, tun ang dinhmunah chuan inthlanna buatsaih chi-ah kan ngai lo," an ti ta hial a ni. 

Tihdam aiin inven a ṭha a, MNF-in hripui leng mek avanga block inthlan an kalpui ngam ta lo pawh hi hri leng laka invenna lam hawi a nih hmel.