Fai leh thianghlim tura ṭan lak

Tun hnaia ruahsûrah Dawrpui veng huam chhunga Assam Rifles ram bul kawngpuiah tui tling a awm zauh zauh a, tuihâwk luankawr ṭhat tâwk loh vang niin a lang. Tuihâwk luankawr ṭha lo ṭhenkhat chu bialtu MLA hoin PWD hotute leh Assam Rifles hotute'n an enfiah a, a theih ang angin tuihâwk luankawrte an tifai nghal bawk a; a lawmawm.

Dawrpui veng hi mipui pan khawm veng a ni a, hnam dang rawn zinte pawhin an tlawh tamte zinga mi a nih avangin faina leh thianghlimna lamah ṭan lak zual a ngai. Khawpui timawi lotu leh tibâltute tihfai zung zung a ṭul zual.

Dawrpui chauh ni loin, Aizawl khawpuiah hian hmun hrang hrangah bawlhhlawhin tuihâwk luankawr a hnawh a la awm nual mai thei a, khawpui dangahte pawh a awm nual mai thei. Fûr a hnai a, tuihâwk luankawr ṭha lote chu mipui harsatna lian zawk a thlen loh nan a kaihhnawih sorkar department te, khawpui enkawltu municipal hotute leh khawtlang hruaitute'n an enfel a, thenfai zung zung a ṭul.

Kum kal tate leh kuminah pawh khua a ṭhál vang vang hnua ruah bawhawk sûr hi Aizawl khawpui leh a chhunga chengte hian kan zo meuh lo ni berin a lang. Ruah bawhawk súrah tuihâwkin hnawmhnawk leh bawlhhlawh chi tinréng, duhdah taka mipuiin kan paih ṭhinte a rawn lên chhuak a, khawlai a ṭawp phah em em. Kan nihna dik tak a rawn lantir ṭhin a, faina leh thianghlimna lama kan la changkan lohzia kan hmu thar ṭhin.

Khawpui fai leh mawi nei tur te, lui tui a thianghlim zawk theih nan sorkar leh mawhphurhna bik neite'n an tih tur tak tiin ṭan la zel se. Chutih rualin, mipui thlàwpna tel lo chuan an hlawhtling tak tak thei lo. Bawlhhlawh tam ber awm chhan chu mipui kan ni. Khawpui fai nei turin mipui mawh a lian hle.

Mipui hian fai leh thianghlim duhna tak tak kan neih a ngai a; kan khawpuite mai bakah, kan lui tuite faina leh thianghlimna turin mi tinin ṭan kan lâk zual a ngai tih i hre thar ang u.