Mizoram mau hman ṭangkai

Horticulture Minister chuan May 8, 2024-a Sairang leh Lengpuia sorkar sak warehouse-te a tlawhnaah, Mizorama thing leh maute hman ṭangkai dan an ngaihtuah thu leh, Mizorama maute hmangin thil tam tak siam theih a ni a, meihawl leh furniture ṭha tak takte pawh siam theih a nih thu a sawi.

Minister hian kumin tìr lam khan Taiwan rama mau an hman ṭangkai dan leh an sâwngbàwl dante sorkar official ṭhenkhatte nen a hmunah an zir chiang tawh. Mizorama maute hman ṭangkai dan tur an zir chhuak ngeiin a rinawm a, Mizoramin hlâwkpui ngei theih nan bawhzuiin hma la zui ngei se a duhawm.

Mizoramah mau chi hrang hrang a tam a, a sawngbawlna leh thil dang siam chhuah nan kan hman ṭangkai tâwk loh avangin state páwnah an tawlh chhuak ruih ruih ṭhin a; a uiawm viau.

Ram hruaitu lo ni tawh ṭhenkhat zingah Mizorama rualṭo maute hnualsuat ang maia state páwn aṭanga mau leh rua lâk luh tuipui tlat an lo awm tawh ṭhin. Kha'ngte kha tihhlawhtlin ni se chuan kan state economy pawhin a ṭhan phah mai thei. Mahse, mi tam tak chuan mumang ram thil leh suangtuahna ringawta an ngaih bakah, a hlawhtlin tak tak an ring lo deuh niin a lang. Tute emaw hlâwkna tura sum siamna remchanga ngaitu pawh mi tam tak an awm bawk.

Mizorama tualṭo mau, Siamtu'n ram leilung mil thlapa a dah sate hi hman ṭangkai lehzual theih dan tur sorkar leh mithiamte'n an ruahman a ṭul a; mau sâwngbàwlna leh mau aṭanga thil siam chhuah lam buaipui theite kawng an kawhhmuh a, a remchan anga an puih a ngai.

Tuna Horticulture Minister-in mau hman ṭangkai dan tur a sawite hi sawi ringawtah tàwp loin, a hlawhtlin ngei theih nan sorkarin theihtawp chhuahin, chak takin bawhzui se a duhawm hle a ni.