Zirtirtu atan a tling leh tlâk lak

Sorkar hmasa hun laia SEDP hnuaia zirtirtute leh thawktu dang lâkte chhawr an nih hun a tàwp hnai a, May 31, 2024 thleng thawk tura tih an ni. Anmahni thlâktu tur zirtirtu (casual teacher) eng emaw zat sorkar tharin lâk a tum a, kumin March 15 khan advertisement pawh chhuah a ni tawh a, tihfel erawh a la ni lo.

Sorkarin casual teacher lâk a tum hi high school atan mi 350, middle school atan mi 371 leh primary school atan mi 694 a ni a, a vaiin mi 1,415 a ni. Lok Sabha inthlan vanga Model Code of Conduct hlih a nih veleha lâk a nih thuai theih nan tuna tih theih chinte chu lo inpeih vek se a ṭhain a rinawm.

Hun kal tawhah duhsak zawngte leh party mi chhungkua aṭanga zirtirtu tur lâk a lo awm tawh ṭhin a, sorkara thawktu lâknaah zirtirtu lâk hi ruling party inrawlh nasatna ber a ni hial mai thei. Hun kal tawha SEDP hnuaia zirtirtu lâkah pawh ruling party unit/block-te'n advertisement an chhuah thu te, an mi duh zawng lâk an nih thu te sawi a lo ni tawh ṭhin. Party leh laina induhsaknaa thawktu inthun tamna a nih avangin Mizoram zirna pawhin a tuar a, a chhiat phaha ngaitu pawh tam tak an awm niin a lang.

Zirtirtute pawimawhzia an sawi ṭhin a, a dik. Mizoram zirna siam ṭhatna atan leh ram hma lam huna hna pawimawh leh nihna pawimawh tak tak la chelh turte chhertu an nih avangin zirtirtu lâkah fimkhur a ngai. Casual teacher mi sang chuang lâk turah pawh hian mimal, chhungkua, hmel hriat hnaivai leh political party thila induhsakna awm loin, a tling leh tlâk apiang zirtirtu atan lâk ni thei se.

Tunah chuan sorkar sikul mai bakah, mimal sikulah pawh zirtirtu atan zirtirtu ni tura a bika inzir chhuak (trained) chauh lâk tur tih a ni tawh a; chuvang chuan, trained teacher chauh lâk ni thei se. Chutih rualin, trained teacher-in mamawh zat an daih lo thei a, chutiangah chuan inhriatthiam a ngaihna chin pawh a awm thei bawk àwm e.