Nurse-te inhlan tharna ni

May 12 Pathianni kha International Nurses Day a ni a, thupui chu 'Our nurses, our future, the economic power of care' tih a ni. Nurses Day hi Pathianni-ah a tlâk avangin Mizorama hmun ṭhenkhatah chuan May 10 khan hman a ni.

International Nurses Day hi nurse ropui leh lâr Florence Nightingale hriatreng nan a pian champha May 12-a hman ṭhin a ni a, khawvel hmun hrang hranga nurse-te chuan an ngaihlu a, Nightingale-i pawh an ngaisang tlangpui.

Nurses Day a lo thlen hian Mizo nurse zawng zawngte'n Day hmannaah ringawt tàwp loin, Day hman a nih chhan - Florence Nightingale-i huaisenna te, inpekna te, ṭhahnemngaihna, tlawmngaihnate leh a hnaa a chiannate hi rilruah vawng thar leh a, an entawn thar leh a ngai.

Mizo nurse zingah fel tak tak, zaidam leh nunnem, ṭhahnemngai leh taima tak tak tam tak an awm rualin, sawisel kai leh an hnaa inpe tâwk loa ngaih theih an awm leh zauh ṭhin a; a bik takin sorkar damdawi-ina thawkte zingah sawisel kái leh demawm deuh an tam bik em ni aw, tih turin thil a awm leh zauh ṭhin.

Nurse-te hi mite rawngbawlsaktu, mite natna tuam dama thâwi damsaktu an ni a, khawtlang tana mi ṭangkai tak an ni. An kut leh kete mai bakah, an ṭawngkam leh an mitmei thlengin damlote'n an thlamuanpui ṭhin an ni. An hna hi hna pawimawh a ni a, rawngbawlna tak tak rilru pu chunga dawhtheihna leh inpekna thûk zawk nen an thawh zel theih a pawimawh.

Nurses Day hi Mizo nurse zawng zawngte'n ṭhahnemngai lehzuala thawk tura inpek tharna atan hmang se. Mimal nuna harsatna eng emaw a awm palh pawhin an hnathawhnaa lang chhuak lo turin fimkhur se, eizawnna a nih rualin, rawngbawlna a ni tihte leh damlote'n an thlamuanpuia an dam phahna an ni tih inhre thar se a duhawm.