Zirlaite daih zirlaibu nei tura ṭan lâk a ngai

Aam Aadmi Party, Mizoram hotute chuan, zirna kum (academic session) kal mek 2024-25 ah sikulah zirlaite thla khat chuang sikul an kai tawh laiin, zirlaibu lei tur awm lo a la awm nual tih an sawi a; naupangte'n zirlaibu an chan kim thuai theih nan chak taka hma la turin sorkar an phût tih May 10, 2024-a press conference an neihah an puang.

Zirlaite daih zirlaibu la awm lote chu elementary school lamah a ni a, Mizo, English leh Environmental Science subject-te a nia sawi a ni.

Mizorama zirlaite daih zirlaibu tun thlenga a la awm lo hi a zialo hle mai a, sorkara thuneitute an ṭan a ngai. Zirlai zinga eng emaw zatin zirlaibu an neih loh miau chuan a nih dan tur ang takin lehkha an zir thei dawn lo tih a chiang a, chu chu zirnaa hnufûmna thlentu a ni thei a, zirna ṭha neihna tura dâltu leh hmasawnna tiṭhuanawptu a ni thei.

Mi tam takin Mizorama zirna a ṭha tâwk loah an ngai a, a chhan tam tak a awm thei ang. Zirlaite'n zirlaibu an neih hi zirna ṭha neihna tura pawimawh tak pakhat a nih a rinawm. Chuvangin sorkar hian zirlai zawng zawngte daih ngei tur zirlaibu lei tur a awm theih nan ṭan a la tur a ni.

Kum khat chhunga zirlai awm zat ngaihtuahin a kum leha zirlai awm zat tur àwm ang pawh a chhût theih ngeiin a rinawm a. Chuvangin, kum lo la kal leh zel turah chuan academic session tìr, sikul ṭan hmain zirlaite daih zãn tur zirlaibu chhut hman ngei ni tawh se, chutiang tur chuan mawhphurtute pawhin ṭan la rawh se. Harsatna sawi reng leh chhuanlam siam reng hi sorkar ṭha kalphung tur a ni lo.