Leivûng paih dan enfiah a ṭul

Mizoram Journalists' Association (MJA) Lunglei district member-te chuan May 9-10, 2024 khan National Highway-302, Lunglei-Tlabung kawng siam mek chu Kawrpuichhuah thlengin an enfiah. Kawng laihna leivûng paihna (spoil bank) mumal taka siam a awm loh thu leh leivûngte chu kawng thlanga nawr liam mai mai a tam thu an tarlan bakah, ram leh mipui tana ṭha zawk tur nia an ngaih hrang hrang an tarlang.

Mizorama journalist-te hian an pawl MJA angin hmasawnna hnathawh an lo enfiah tawh ṭhin a, a lawmawm. Mizoram ṭhatna leh hmasawnna duhna tak tak thinlung nen MJA leh thuthar thehdarhtute hian Mizorama hmasawnna hnathawhte a remchang angin enfiah zel se, thil ṭha lo chu huaisen taka puangzarin, fak ngaite pawh fak mai zel se, ram leh hnam tana an ṭangkaina a sang lehzual ngei ang.

Kum eng emaw ti lai aṭang khan Mizoram hmun hrang hrangah national highway kawngpui zauha siam a ni. Kawng siamtute'n lei an laihna vûngte chu a paihna/dah khawmna hmun siamin an paih tur a nih laiin, kawng thlangah an nawr liam mai ṭhin a, hmun tam takah hmuh tur a awm.

Kawng thlanga leivûng nawr liam mai ṭhin hian thing leh mau nasa takin a tichhia a, luite a hnawh a, nungchate chênna tur nasa takin a tichhia. Environment humhalh duhtu pawlte'n nasa takin an dodal a, kawngzawhte hial an huaihawt tawh. Mipui náwlpui pawhin an ngaimawh hle tih a hriat theih.

Nasa taka sawisel leh dodalna a awm chunga kawng siamtute'n leivûngte tun thlenga a paihna hmun tura paih lo a, kawng thlanga an la nawr liam zui ta zel hi a zialo tak zet. Dan zawm lohna a nih mai bakah, Mizoram leh Mizo mipui thamlohna a ni thei hial ang.

Leivûng paihnaah chauh paih turin sorkarin kawng laitu leh siamtute a lo hriattir tawh ṭhin, mahse, an zâwm ṭha lo hle. Kawng siamtute hian huaisar riau chhan an nei em ni? Mizoram sorkar hian kawng thlanga leivûng paih tawh lo turin na takin a nawr ngam lo em ni? Na taka nawr ngam lohna chhan lian tak, mipui hriat chi si loh a awm em ni? Hengte hi mipui rilrua awm ṭhin a ni.

Kawng laihna leivûngte kawng thlanga nawr liam a nih tawh loh nan sorkar hian mit a lên reng a, a enfiah ṭhin a ṭul. Contractor-te pawh na lehzualin nawr se. Hriattirna chhuah ringawtah duhtâwk loin, hriattirna chu an zawm ngei theih nan a takin bawhzui bawk rawh se tih hi Mizoram mipui duh dan a ni ngei ang.