Aizawl Civil Hospital

Aizawl Civil Hospital Medi-cal Superintendent chuan thuchhuah siamin, damdawi-in inrêlbâwlna a ṭhat zawkna tur leh felfai zawkna turin ruahmanna a siam thar a, zawmsak turin mipuite a ngen.

Damdawi-ina damlo kan hun, lirthei tlan luh phal loh leh damdawi-in faina leh thianghlimna vawn chungchangah Medical Superin-tendent hian ṭan lak thar a tum niin a lang a, a lawmawm hle.

Mizoram hmun hrang hrangah damdawi-in ṭha tak tak awm tawhin Referral Hospital meuh pawh nei tawh mah ila, mipui nawlpuiin an pan tam ber leh pan remchang ber chu Aizawl Civil Hospital hi a la ni reng. He damdawi-in hi mirethei leh harsa ber tan pawh pan a awlsam avangin an la pan zel dawn a, ruahmanna thar siamte hi mipui pawhin zawm ila a ṭha khawp mai.

Medical Superintendent hian inenkawlna lamah khauh zawka kal a tum tih a lang a, mipui lam kaihhruaina ṭha zawk a siam thar dawn. Hetih rual hian hnathawktu lamah pawh intuaitharna neih hi a ṭhat a rinawm a, doctor zingah ngei pawh infuih thar mamawh an awm ve thei tho ang.

Aizawl Civil Hospital-ah hi chuan dan naranin doctor-ah pawh a thiam leh senior deuh zawkte dah an ni a, nurse lam pawh kum upa leh tawnhriat ngah
ṭhahnem tak an awm. Heng mite hlei hlei hian intuaitharna neih hi an mamawh ve thei a, ngaia neih leh lo tihṭhan tawh dan ringawt ring loa, mipui rawngbawlna hna an thawh mek hi inpekna thar nen hmachhawn se; doctor leh nurse-te ber an harh thara inpekna thuk zawk nen hna an thawh chuan, Aizawl Civil Hospital hian hmel danglam a pu thei ngei awm si a.