Sorkar lirthei mimal thila hman

Mizoram sorkar chuan thuchhuah siamin, tunlaiin officer ṭhenkhat sorkar lirtheia sikul naupang hruai ṭhin an awm a, heng mite hi ti tawh lo turin a hriattir bakah sorkar lirtheia naupang hruai man an nih chuan a ṭul anga action lak a nih tur thu an chhuah.

Sorkar lirthei hman dan hian sawi a hlawh ṭhin a, tun thlenga sawi nawn a la ngai hi a zialo ngawt mai. Mizoram sorkarin sum nei lo nia a insawi dan leh sorkar lithei hman dan hi chu a inpersan hlauh a, state dang tam takte aiin sorkar hian lirthei a lei nasa a, a hman danah pawh state dang sorkar hnathawkte aiin an inren lo zawk a ang hle.

Sikul naupang hruaina tur a ni emaw, mimal thil pawimawh dangah pawh sorkar lirthei hi chu hman loh tur niawm tak a nihlaiin mimal thila sorkar lirthei hmang hi an tam hle a, heng mite hi sorkar officer chin vek an ni. Sorkar officer-te hian kan sorkar zia hre chiangin an hlau lo hle a, mi an vau mai mai a, action an la ngam tak tak loah an ngai nge, sorkar thil mimal tana hman hi an zak lem lo niin alang.

State ṭhenklhatah chuan sorkar hian lirthei hi an lei mai mai lo a, officer lian chin chauhin an kawl ṭhin. Mizoramah erawh chuan officer tenau zingah pawh sorkar lirthei kawl eng emaw zat an awm a, sorkarin inrenchem tumin lirthei titlem ve deuh tawh mah se tun thlengin lirthei lei leh chelek nasa pawl state kan la ni zel a, kan sum bawm dinhmun nena teh phei chuan a zahthlak hle a ni.

Engpawhnise sorkar hian a thuchhuah hi a takin bawhzui se, sorkar lirtheia sikul naupang thlah piah lamah mimal thila sorkar lirthei hman hi a tawp theihna turin sorkar hian ṭan la rawh se.