Home Minister thukhawchang

Home minister R Lalzirliana chuan, Aizawl dáia rangkachak phur motor suam thubuaiah tu pawh inhnamhnawih se an tuar mai tur a ni tih a sawi a; "A inhnamhnawih an lian a nih pawhin an tuar mai tur a ni. Thil dik lo titute chu tu pawh ni se hlauh tur a awm lo. Vênthâwn nei loin police-te'n an chhui a, hei hian police-te kut phuar an ni lo tih a tichiang hle," a ti.

Home minister-in tunlaia mipui ngaihven tak mai thila thu chiang tak a puang chhuak hi a lawmawm a, he-tiang thil ngaihven hlawh bik leh thil lian thamah hi chuan sorkar mi pawi-mawhte an ṭawng chhuah hi inhmeh reng a ni. He insuam-na thlen dan hi a mak hle mai a, a chhuina kawnga police lam hnathawh a fakawm a, chak takin chhui zui zel se a ṭha hle.

He insuamnaa thil lang chiang tak chu Mizoram hi smuggling kalkawnga hman a ni, tih hi a ni. Police lam hi chuan a insuamna leh silai hmanga invauna hi an ngaimawh a, hei hi an tih tur zawn pawh a ni a; nimahsela mipui lam ngaimawh lian tak chu Mizoram chhunga sorkar phal loh thil kal tlangpui a ni fo hi a ni.

Silai leh ralthuam man thawm a khat tawkin kan hre reng a, man loh tam tak a awm tih a chiang. Kan ram hi tute emaw hian sorkar phal loh thil tawlhrukna ramah an chhuah mek a, a pawi takzet a ni.

Mizoram hi state population aṭanga chhutin police ngah ber pawl kan ni a, kan ram ven tur pawh hi a zau vak lo a, hmun pawimawh bikah hi chuan indah tam deuh thei se a ṭha ngawt mai. Myanmar leh Mizoram inrina check gate-te hi tun aia khauh hian enkawl ni se, police zingah tham theih an awm palh ang tihte a hlauhawm a, 'check gate-a duty-te an hausa duh,' tia hmun danga an sawi ṭhinte hi heng hmun pawimawh bikah hi chuan thleng ve lo se a ṭha ngawt mai.

Sorkarin police-te hnuchhui dan chhuang taka a sawi hi chhuanawm viau mah se, Mizo-ram chhungah awlsam takin smuggling kalpui mup mup a lo ni reng tih hriat hi venghimtu lam tan chuan mualphona a ni tel. Home minister-in thil awm dan a hre chiang tawh a, kan rama smuggling kalpui a ni fo mai hi titawp turin ṭan la se, tuna rangkachak boah mai ni lo hun lo kal lehzel turah pawh a inhnamhnawihte chu tu pawh ni se chhui chhuakin man ngam zel rawh se.