Ṭanrualna nen kan hneh thei ang

Mizoramah tun hnaiah Covid-19 positive hmuh chhuah a ni telin an tlem chho hret hret zel a, tualchhunga inkai darh phei chu hmuh chhuah a tlem sawt hle. Tun ang zela a kal chhoh chuan, mithiamte'n December-ah Covid-19 positive mi 5000 an kai theih an rin pawh hi a thleng lo mai dâwn niin a lang ta. 

Covid-19 dona kawngah Mizoram hi in lungrual leh thawk ṭha ber pawl a ni a, tun thlenga he hripui thihpui an awm lote hi a lawmawm hle a ni. Tuna hri kai thar hmuh chhuah chhoh dan ngun taka chhût hian, mipuiin sorkar dan an zawm ṭhat a, sorkarin tha thlah loa a beih zel chuan, he hri hi kan ramah hian kan do hneh theih a beiseiawm hle a ni. 

Covid-19 do tur hian ṭanrual hi thil pawimawh ber pakhat a ni. Keini aia inenkawlna nei ṭha zawk leh ram changkang zawka ngaihah te pawh an inveng hleithei lo a, mipuiin dan an zawm ṭhat loh avang leh chhan hrang hrang avangin Covid-19 hi a darh nasa hle. 

Mizoramah erawh chuan mipuiin sorkar an thlawp a ni satliah lo a, sorkar lamah ṭangin hri dona kawngah tha leh sum thawhtuah an ṭang a, chumi rah ṭha chu ramin a hmù chho mêk a ni. 

Covid-19 dona kawngah Mizoram mipuite'n ṭan la thar ila, vengtu police awm leh awm lohah innghat loin mahni ṭheuh inveng thiam ila, sorkar thupek kan zawm ṭhat bawk chuan Covid-19 hi ṭanrualna hmangin kan do hneh theih beiseina a säng ta hle.