Mipui tana hnathawh

Mizoram Civil Service Asso-ciation Annual General Con-ference-a khuallian minister Zodintluanga chuan, sorkar hnathawkte chu mipui tana thawk tura awm an ni tih sawiin, an awm chhan hre chiang tur leh sorkarin a dahna apianga awm turin MCS officer-te a chah a; MCS officer-te chu sorkar policy duangtu, sorkar hnuk pawimawh an ni tih sawiin, "Sorkar tan in pawimawh em em a, in thawh ṭhat leh ramin hma a sawn chak ang a, in thawh ṭhat loh chuan ramin hma a sawn lo ang," a ti.

Sorkar hnathawk ṭheuh ṭheuh, hna-thawh inang, hlawh zat inang, service khata lut hi an inthlau thei khawp mai. MCS officer ṭhenkhat chu midangte ngaihsan rawn, sorkar pawhin innghahna atana a hman, an tel loa sorkar a kal hleih theih loh khawpa mi ṭangkai an awm. Hetihlai hian MCS ni ve si, an ei ru tih
ṭhenawm khawvengin an hriat, sorkar tana hnawksak leh a dahna tur post pawh an hriat mang lohte an awm thei.

Sorkar hna a ni emaw eng hna pawh thawk ila rinawm taka thawh a ṭhat thu sawi ṭhin a ni a, hei hi chu thudik awm sa a ni. He mi piah lama Mizo officer-te'n an mamawh lian tak chu 'mipui tana thawk tura awm an nih an inhriat' hi a ni a, hei hi minister-in MCS officer-te a hrilh tum tak pawh niin a lang. Officer ṭhenkhat hi chuan midang puih dan an zawng lo mai ni loin, midangte tana hnawksakin an khawsa fo a, sorkar hna hi a tawpkhawkah chuan mipuite tana hnathawhna a ni tih hi an man lo hle a ni.

MCS an ni emaw, officer dang pawh ni se, mipuiin an ngaihsan loh leh ngaihnep khawpa inthlahdah an awm thei a, mipui lamin hetiang mi sawi tur hi an hre thei hle. Chumi lehlamah chiah chuan mipuiin an ngaihsan rawn khawpa hnathawk ṭha, sorkar leh mipui tana ṭangkai an awm bawk. Heng mite hi thiamna lamah chuan an intluk reng a, service inanga lut an ni a; nimahsela an danglamna chu an hnathawh duh danah a ni.

Sorkar hnathawkte hian mipui tana thawk an ni tih hi hre chiang se, chumi rilru pu chunga hna an thawh phawt chuan 'officer biak nuam lo' kan tihte leh harsatna siam ching hi an bo tawh ang a; mipuite tana inpe leh mipui tana hnathawk an ni tih inhre chiang officer-te hi chu mipui pawhin an hre chiang hle a ni.