Tumruhna nena zir chhunzawm zel

Mizoram Board of School Education chuan May 14 khan High School Leaving Certificate (HSLC) Examination 2024 result a tichhuak ta a, zirlai exam 18,561 zinga 13,618 hlawhtlingin, pass percentage 73.37% a ni.

MBSE-in harsatna lian tham awm loa HSLC exam an buatsaih leh result an tichhuak thei hi a lawmawm a, thawktu leh mawhphurhna nei zawng zawngte thawh rim rah a ni. Chutih rualin, exam laiin zirlai zingah subject pakhata zawhnate hre rù an awm a, zirtirtu suspend hial an awm phah. Khatiang thil kha a thlen tawh loh nan MBSE-a thawk te, zawhna siamtute leh mawhphurhna nei apiangte an fimkhur lehzual a ṭul.

Kumin HSLC-a zirlai hlawhtlingte an lawmpuiawm a, hlawhtling zo rih lo zirlai 4,837-te leh compartmental chance nei zirlai 59-te pawh hnual mai loin, hlawhtling ngei turin inzir zel se la, tuna pass tate ai pawha hlawhtling an la ni thei a ni tih hria se.

Zirnaah hian HSLC hi kailàwn pawimawh tak a nih rualin, mihringin a nih tum leh a nih tur ang a thlenna tura a bulṭhut ang chauh a ni a, an hma lamah zir tur leh paltlang tur tam tak a la awm. Hlawhtling zui zel tur chuan ṭan mar pát a ngai.

HSLC-a ṭih ṭhat te, pakhatna nih te, top 10-a lante hi a lawmawm a, a hlu em em. Mahse, zirna sang zawkah tih ṭhat leh si loh chuan HSLC-a pakhatna nih ringawt chu a hlu viau kher lo mai thei. A pawimawh zawk chu nun nghet neih leh tlo a ni.

Division hniam zawka pass te, fail-te pawh an nun kal zelah tumruhna nen taima taka an beih zui phawt chuan pass ṭha tak takte aia hlawhtling an ni thei. Pakhatna nih leh a ṭha zual zinga lang phâk nih a ṭha em em a, mahse, an ṭha ber reng kher lo tih hre chungin zirlaite an inzir zel se, an nu leh pate pawhin an fuih sauh sauh a pawimawh.