Vawk pûl hri buaipui a ngai e

Tun hnaia vawk natna, Porcine Reproductive & Respiratory Syndrome (PRRS) lêng avangin Champhai, Lunglei leh Lawngtlai district-ahte vawk 2,620 vel an thi tawh a, vawk damlo eng emaw zat a la awm. AH&Vety department hotute hmun hrang hrangah zin kualin hri leng avanga harsatna chinfel tumin theihtawp an chhuah mek zel.

Mizorama vawk pûl hri leng mek hi chhungkaw tam tak tan chhiatna lian tak thlentu a ni a, chhungkaw tam tak innghahna an vawk vulh ber a thih avangin lungngaiin an kun mek a ni. PRRS hi khawi aṭanga lo lut nge a nih a, engtia inkai darh chiam nge a nih tih hi mi thiamte hian an chhui chhuah ngei a ṭul a ni.

Mizoram sorkar pawhin NLUP a kalpui mekah hian vawk vulh turin mi tam tak hnenah ṭanpuina a sem a, tuna PRRS leng ta hi NLUP dawngtute tan pawh harsatna lian tak thlentu a ni mek ang. Mizorama kan sa ngainat ber pakhat leh kan ran vulh tlanglawn tak mai hetianga hri hlauhawm takin a suat chiam mai hi a pawi a, heng hun hi mithiamte thiamna chhawr kan mamawh hunlai tak a ni e.

Hri leng hi ram pawn aṭanga vawk lakluh aṭanga inkai chhawn a nih leh nih loh hi finfiah ngei ni se, ram pawn aṭanga lo lut a nih chuan ram pawn aṭanga vawk lakluh hi hun rei tak chhung chu tihtawp nghal a ṭha ang. Chhungkaw tam takte ṭahna thlena harsatna siamsaktu vawk pûl hri hi Vety lam mi thiamte hian ngun takin chhui chiang se, nakin zela harsatna a thlen nawn tawh lohna turin a ṭul angin ruahmanna siam rawh se.