Mimal hnaa sorkar mi chhawr

1st Battalion IR commandant chu Kolasib Ṭumpui Venga a mimal in sakna turah 1st. IR mi leh sa eng emaw zat a chhawra sawi a ni a; Kolasib-a thuthar lakhawmtute'n a hmunah enfiahin, IR mi leh sate hnathawk lai an hmu a ni.

He thil thleng hi Mizorama sorkar officer ṭhenkhatte chet dan en chuan thil mak danglam tak a ni lem lo a, a thlen vawikhatna a ni lo ang bawkin a thlen tawpna pawh a ni kher lo ang. Officer tam tak hian sorkar mi leh sate hi an mimal thilah an chhawr nasa hle mai a, heng zingah hian police officer-te hi a langsar pawl an ni ngei ang.

Police officer hian sipai ṭhahnem tak an enkawl avangin an tan chhawr an awlsam bik a, danin chhawr a phalsak chin erawh a awm. Mimal hna thawk tura sorkar hnathawk ve tho chhawr hi chu thil fel lo tak a ni a, tuna Home Minister hi he thil tihtawp a tum thu sawi chhuaktu kha a ni a, a la tawp lo tih hre chiangtu chu police officer ṭhenawmte leh police constable-te an ni ngei ang.

Police chauh an ni lo, officer dang zingah pawh mahni remchan anga staff-te chhawr ching an awm a, hei hi tihtawp ni se a ṭha ngawt mai. Sorkarin sorkar hna thawk tura a rawihte mimal hna atana pawh pen hi thil fel lo tak a ni a, he thil hi Mizoram chhungah kum tam tak kalpui (practice) a ni tawh a, bansan theih ni se a ṭha hle a ni.

Sorkar depart-ment hrang hrangah mahni staff-te mimal hnaa chhawr ṭhin sawi tur tam tak an awm a, hei hi dan kalh a ni tih mipui hre thar ila, hetiang ti ṭhin officer-te pawhin sim tawh se; sorkar hnathawk tura sorkar mi rawihte hi chu sorkar hna pawn lama pawh pen i sim ang u.