Chhiatna thleng lo tura fimkhur

Khatla veng huam chhunga MLA Hostel bula thing ṭhenkhat chu mipui tan a him lo theia ngaih a nih avangin nimin khan thing zárte thlâk a ni a, vawiinah an chhunzawm leh dawna sawi a ni. Thing zár thlâk chhungin a bul kawngpui chu khâr a ni a, lirthei tlân dan pawh tihdanglam a ni.

Mipui tana him lo theia ngaih thing zár thlâk a ni leh chutiang tura thuneitute hmalakna a lawmawm. Thing zár thlâk a nih avanga kawngpui khâr vangin traffic jam a nasa deuh a ni thei a, nakin zela mipui himna tur leh chhiatna a thlen lohna tura hmalakna a ni tih hriaa kan inhriatthiam tlân a ngai.

Khuarèl chhiatna hi pumpelh vek theih a ni lo a, vanduaina pawh pumpelh vek theih a ni lo. Chutih rualin, fimkhurna vangin vanduaina ṭhenkhat chu pumpelh theihte pawh a awm thei a, khuarel chhiatna vanga tawrhna pawh tihnêp deuh theih a awm ngei ang.

Aizawl khawpui mai bakah, khaw dangahte pawh leilung awm dan leh thing dingahte mipui tana him lo, chhiatna thlen thei thil a awm thei a, chu'ngte chu enfiah a, mipui tana him lote chu siam rem zel a ṭul. Fûrpui a thleng hnai a, fûrpuiah hian khuarel chhiatna a thleng tam deuh ṭhin niin a lang a, chuvangin, sorkar thuneitute'n ṭan an lâk sauh sauh a ṭul.

Mipui pawh fimkhur tlân a ngai. Khuarel chhiatna anga sawi tam tak hi mihringte fimkhur loh leh inthlahdah vanga thleng a ni ve fo. Keimahni, ṭhenawm hnaivaite leh mi dangte tana chhiatna thlentu ni lo turin fimkhur ila; mahni in leh a vêlte enfiah ṭhin ila, in sakna tur leh thil dang atana lei laite pawh an fimkhur lehzual a ngai e.