Eirûkna leh hlemhlêtna bitum

Aizawl District Court-a Special Court (PC Act) chuan kum 2007 báwr vela India leh Bangladesh ramri hungna tura mimal ram lâkah ram pass (LSC) lem hmanga zangnadawmna dawngtu mi eng emaw zat chu May 17, 2024 khan thiam loh a chantir a, thiam loh changte hrem dan tur chu la puan leh tur a ni.

Kum 10 chuang fé kal taa thil dik lo titu, hlemhlêtna thila inhnamhnawihte court-in thiam loh a chantir hi ram leh hnam kal zel turah thil ṭha a nih a rinawm. Hun eng emaw ti aṭang khan eirûkna leh hlemhlêtna (corruption) thubuaiah thil dik lo tia puhte thiam loh chantir an ni ta zauh zauh bawk.

Hetianga court-in huaisen taka thutlukna a siam ṭhin hi Mizoram mipui an làwm a, tun hnaia corruption case-a court thutluknate avangin mipuiin court chungah rinna an nghat thar leh ta ni pawhin a lang.

Hun eng emaw ti lai khan mipuiin dan hmanga roreltu court chungah rinna an nghat ngam meuh lo em ni chu aw, tih theih turin thil a lo awm zauh zauh tawh. Mi hausa leh thil ti thei, mi langsarte'n court-ah thiam loh an chang thei meuh loa ngaihnate pawh mi ṭhenkhat rilruah chuan a awm hman niin a lang. Court chungah meuh pawh mipuiin rinna an nghah ngam loh chuan thil pawi tak a ni.

Court hi mi chi tin intluktlànna hmun tur a ni a, mi hausa ber leh thil ti thei berte leh mi rethei leh hnuaihnung berte pawh angkhata enna hmun tur a ni. Chutiang tak a nih theih nan chuan dan hmanga roreltute pawh an ṭan mar zel a, thlei bik nei loa ro an rèl zel a ṭul ang.

Tun hma lama thil dik lo, eirûkna leh hlemhlêtna thlengah tun hma thil a nih avanga ngaihthah leh bawhzui ṭhat duh loh hi sualna tipungtu, thil sual ti theite tingampatu a ni thei. Chuvangin, dik chu dik, dik lo chu dik lo a nih angin, kan ramah sualna, dik lo taka thil tih, eirûkna leh hlemhlêtnate a bo theih nan ngaihthah loa bitum chat chat zel a ṭul em em bawk.