College admission

Mizorama college hrang hrangah kum 2015-16 session khan seat 14,191 a awm a; hetih lai hian, HSSLC Examination 2016-ah pawl 12 pass zirlai 8,747 an awm. Degree course-a seat awm zat 14,191 hi MBSE hnuaia kumina pawl 12 pass thar zat hi 5,444-in a tam zawk.

Heti chung hian college admission-ah hian buaina leh harsatna tam tak a awm ṭhin a, a chhan chu khawpui college-a luh kan tum deuh vek vang a ni. Khawpuiah pawh Aizawla college-te hian bawhtu an ngah zual a, Mizorama college ṭhenkhat an thawl viau laiin Aizawlah chuan class room-a leng mang lo inêk beng ṭhin a, hei hi zirnain a tawrh phah thei ang.

Mizorama kan kalphung ṭha lo tak chu college admission hi merit-a kalpui a ni lo ṭhin hi a ni. College ṭhenkhat chuan tihṭhat dan indawtin zirlai an la mai a, lut phak lo chinte pawh an awm a, hei hi state dangah pawh an tih dan a ni. Hetihlai hian mahni duhsak zawng lo thun ve mai ṭhin an awm bawk a, hei hian inthliar a tibuaithak zo ṭhin a ni.

College admission hi merit-a kalpui ni mai se, a tiṭha apiang la se, college pakhata lâk theih zat bituk aia an tam chuan tute mahin nawr lui lo bawk se a
ṭha khawp mai. Zirlai pawlte pawh hetiangah hian inrawlh lo se, zirlai tiṭhate nihlawhna turah zirlai pawl hmelhriat nei ṭhate'n seat an chang a nih chuan a fel lo hle a ni.

Engpawhnise Mizorama college-te an ṭan tlan a ngai tih a chiang a. Aizawl khaw pawnah pawh college ṭha leh rintlak, zirlai pawhin an pan khawm theih hi din a hun ta. Khawvel hmun dangah pawh an khawpui ber hi zirna in lian ber awmna a ni kher ngai lo a, Mizoram khawpui danga college zirtirtute pawh hi thiamna lama chhuanawm tak tak an nih hlawm avangin Aizawl pawna college ṭha din turin ṭan la se, hei hian college admission-a kan buaina tam zawk hi a su kiang thei awm e.