Mipui tana harsatna thlen

Commercial Vehicle Joint Action Committee (CVJAC) chu sorkar laka an thil phut hrang hrang nawrin an nuar a, Mizoram chhungah sumdawnna lirtheite an tlan lo. Hetihlai hian Mizoram Consumers Union (MCU) chuan thuchhuah siamin, pawl ṭhenkhatin Joint Action Committee anga an thil duh leh sorkara an thil phût tihhlawhtlin phutna atana mipui nghawng leh nêkchêp zawnga thil an ti ṭhin chu an dem thu an tarlang.

Tun hnaiah sum-dawnna lirtheite hian harsatna an tawh thu hi vawi tam an sawi chhuak tawh a, sorkar hnenah pawh an harsatna tawh hi an thlen tawh a; nimah-sela sorkar hi a dinna ngaiah a la ding niin a lang a, sumdawnna lirtheite an nuar ta a ni.

CVJAC tia invuah sumdawnna lirthei neitu pawl intelkhawm hian thil thui tak an ngaihtuah lawk vek tawh ang a, chuti chung chuan an harsatna tawhte sorkarin a ching fel duh loa an hriat avangin an nuar lo thei lo a nih hmel. An thlirna zawn aṭang chuan an nawrh chhan hi thil âwm tak ni mah se, mipui vantlang tawrhna leh harsatna an thlentir dan ngaihtuah hi chuan thil ṭha ber a ni kher lo ang.

Sumdawnna lirtheite hi mipui pawisa thawhkhawm hmanga eizawng an ni ber a, mipui aṭanga lirthei chuan man an hmuh chu an intun nunna a ni. Hetihlaia an lungawi loh lantirna atana mipui tana harsatna siam zawnga ke an pen hi chu a inhmeh lo hle a, heti lo deuha kal dan hi zawng thei se a ṭha khawp mai.

MCU lam pawhin an tih tur dik tak tiin thuchhuah an siam vat a, lungawi lo apiangin consumer lam ngaihtuah loa thil an kalpui nia an hriat avangin an dem thu an chhuah. Hei hi thil awm dan dik tak a ni reng a, pawl indin hnua mahni tana ṭha tur nawrna lama mipui tawrhna thlentir hi Mizoramah hian a thleng tam ta hle a, mipui hi an dawhthei hle niin a ngaih theih.

Mizoram lirthei chuan man sanzia mipuiin an hria a, lirthei neituten an lungawi loh apianga mipui tana harsatna thlentir an hreh lo hi chu mipui lam zawkin an dawhthei lo palh ang tih a hlauhawm a; tute pawhin lungawi lohna an neihin mipui tawrhna thlentir lo zawngin kalpui ṭhin se, mipui ngai pawimawh lo sumdawng chungah mipuiin an lungawi lohna an lantir lêt ve ang tih hlauhawm tak a ni.