High court thuchhuak bawhzui

Gauhati High Court Division Bench-in May 17, 2024-a order a tihchhuaha a lan danin, Mizoram Chief Secretary leh Champhai Police Station-a Officer-in-Charge (OC) chu kuhva tawlh rûk chungchanga thupek chhuah tawh bawhzui duh loah High Court-in a ngai a, mimala insawifiahna (individual affidavit) thehlut turin a hriattir.

Kuhva tawlh rûk chungchangah Gauhati High Court chuan January 22, 2024-ah thupek chhuahin, Chief Secretary leh Champhai PS-a OC-te tih tur a tuk. High court thu chu an bawhzui loh avang leh hmalakna a awm loh avangin high court chuan insawifiah turin May 17, 2024-ah a hriattir leh ta a ni.

Tun hma deuh khan India ramah doctor-te an nuar vak mai a, sorkar pawhin tihngaihna a hre tawh lo. Supreme Court a inrawlh a, Supreme Court-in nawrh titawp a, an hna thawk tura a hriattir meuh erawh chuan an nawrh an titawp a, hna an chhunzawm leh ta a. Chuti khawp chuan mipui (doctor)-te'n Supreme Court thu an zah a ni.

Sorkar official-te'n high court meuh thuchhuak an bawhzui lo nia lang hi a pawi hle mai a, ram inrêlbâwlna lungphûm nghawng thil a ni. High court-in a tarlan ang hi a nih chuan 'contempt of court' a ni thei hialin a rinawm a; court-in a ngaih thutak zui zel dan azirin hriattirna a pekate tan thil pawi tak thlen thei a nih a rinawm.

High court thu meuh pawh sorkar leh sorkar hnathawkte'n an bawhzui ṭha duh lo a nih chuan ram inrêlbàwlnaah ram hma lam hun chu ngaihtuahawm tak a ni ve thei. Court thupeka bawhzui ngai chu eng pawh ni se, sorkar mualpho theihna leh sorkar tana ṭha lo tur thil emaw pawh ni se, bawhzui phawt mai hi tih dan tur dik a ni.

Court hi a zahawm a, court thu zâwm duh lotu nih hi tawrhna thlen thei a ni. Chuvangin, court thu zawm leh bawhzui hi sorkar, sorkar hnathawk leh mipui tih tur ngei tur a ni.