CM office leh FIR

Congress party chuan, tun hnaiah thil ho tê têah Mizoram hruaitu lu ber Chief Minister Office (CMO) aṭanga mi hniam zawk leh thil ti thei ve lote vau leh rîkrâp ang zawnga lalna leh thuneihna kalpui a ni leh FIR thehluh a awm ta fo mai chu ṭha lo an tih thu an puang. 

Congress chuan, Mizoram chief mi­nister chu duh duh sawiah puhin, "A risk kual a, an sorkar hmasaka lâr tak Peace Bonus pawh a phuahchawp mai mai a nih thu House zahawm takah a sawi chhuak. Hetiang taka mipui zah lotu lakah hian thubuai siam tur ni se vawi eng emaw zat tâlbuai tawh tur a ni," an ti a; MNF sorkar hotute'n thil ho mai maia ngaih theihah mipui an khin lêtna leh rîkrâp ṭhin ang chi chu communist ramah leh dictator lalna ramah lo chuan a awm khát hle tih sawiin, "Anmahni vote tlingtu Mizoram mipui an zah miah lo a, mipui zalenna thlenga rahbeh an pawiti miah lo tihna a ni," an ti. 

He thil hi political party pahnihte inbeihna angin a duh tan chuan a ngaih theih a. Chutih rualin a thu ken hi kan zir chian chuan mipui nawlpuiin an duhzawng leh ngaihtuahna an sawi chhuahte khap beh tumna leh titim thei tur niin a lang. Tun hma angin tapchhak titi leh khawlai titi ang kha tunah chuan social media a lo awm ta a, kan duhzawng leh ngaihdante chu awlsam takin ziakin kan thehdarh zung zung thei ta a, hetianga miin an ngaihdan leh zeldin thu deuh an chhuahte kan ngaimawh zel dawn a nih chuan, mipui lam hi an er lêt palh ang tih hlauhawm tak a ni. 

Hetihlai hian mipui lam pawhin social media kan hman thiam a ṭul a, tun hma anga kan ṭhiante bula kan thil sawi mai mai ang kha kan sawina tur kan thlan fimkhur loh chuan zau takin a lo darh palh thei a, politics lam rawngkai a nih phei chuan thui taka inhnialna chawk chhuak thei a ni a, kan fimkhur thiam a ṭha hle. 

Thil awm dan thlir hian kan CMO aṭang bera thil lian tham pawh ni lem loa FIR thehluh hi an ching chhunzawm zel a nih chuan mipuiin an chhinchhiah ve kar dawn a, sawisel thiang lo leh sawisel phak loha awm tumah an awm lo a, FIR hmanga mipui vau beh tumna rawngkai a nih phei chuan democracy ramah hian thil chin fo chi loh tak a ni ang.