Vawk vulhtute thil phût leh sa man

Vawk vulhtu pawl, MIPFA chuan state páwn aṭanga vawk pum leh vawksa (frozen pork) lak luh khap turin Mizoram sorkar an phût a, sorkarin a khap loh chuan anmahni vawk vulhtute'n an dan a ngaih dawn thu an puang.

MIPFA hian Mizoram páwn aṭanga vawksa la lut ṭhin leh zuartute chu la lut tawh lo tur leh May 2024 chhunga chingfel turin an chah a; May 20 khan PIGFED dawr kawtah frozen vawksa an hâl. Tun hnaiah bawng sa zuarte'n hnam dang, bawng sa zuarte an lo vaukhàn tawh bawk.

Vawk vulhtu pawlte thil phût leh chêt dan te, hmalak an tum dante hi an dinhmun aṭana thlir chuan thil àwm tak a ni thei ang. State páwn aṭanga lak luh vawksain an eizawnna a tichhe hlea an hriat vang a ni a; sorkar leh a kaihhnawih department pawhin chinfel dan an ngaihtuah a ṭul àwm e.

Mizoram hi kawng hrang hrangah a intodelh ve a ngai. Saah pawh state chhunga miin state mipui zawng zawng a la châwm zo lo a nih pawhin, thar chhuah a pun zel a ngai a, chutiang tur chuan ran vulhtute an pawimawh. Sorkar pawhin a ngaih pawimawh a, a theih ang anga kawng kawng a zawnpui a, hma a lakpui a, a puih a ṭul ang.

Phai lam leh Mizoramah thil man a into hleih miau avangin saah pawh Mizorama vulh leh tharte a to lo thei lo a ni mai thei. A man chu eng pawh ni se, mipuiin an ngaimawh chu - a bikin vawksa leh bawngsaah, an duh lai tak an lei thei lo ṭhin te, an ei duh loh lei teltir an ni ṭhinte hi a ni.

Mizo ran vulhtu leh sa zuarte aṭanga ei duh chuan loh tur lei tel fo ai chuan, phai aṭanga lak luh pawh ni se, mahni duh lai tak lei theih hi a thlanawm zawk fo; a tláwm zawk a nih phei chuan lei zawk mai a àwm em em. State páwn aṭanga sa rawn lut hi Mizorama vulh ran sa man to chak lutuk tur thununtu a ni thei.

Mizo ran vulhtute leh sa zuarte an inenfiah a ṭul, sa man tisang chak lutuk lo se, an duh lai leitir thei ve rawh se. Sorkar pawhin khauh zawkin vil thei se, sa man pawh bithliahin, kengkawh ṭha se a duhawm.