Sorkar leh AMC inring se

Sumdawnna lirthei neitu intelkhawm, Commercial Vehicle Joint Action Committee (CVJAC) chuan sorkar laka lungawi lohna lantirin sum-dawnna lirthei zawng zawng an tlan lo a, mipui tan harsatna lian tak a thlen.

India ram state dangah hian sorkar emaw municipal corporation-in emaw public transport system ṭha tak hi a nei ṭhin a, tun hnaia sumdawng lirthei tlan loin mipui tana harsatna an thlen dan ngaihtuah hian, sorkar hian ruahmanna thar siam se, khawpuiah bik chuan municipal corporation lam an harh a ngai tih a lang.

Puiblic transport system hi tun aia ṭha leh rintlak zawk neih a hun tawh a, tute emaw lungawi loh avanga mipui nawlpui tawrhna a thleng nawn fo hi a pawi khawp mai. Khawpuiah bik hi chuan municipal corporation lam hian ṭan la thar se, state danga an kalpui dante zir chiangin khawpuia bus service tir dante duang chhuak se a ṭha khawp mai. Tuna kan kalphungah hi chuan lirthei chuan man leh chhiah chawi danah emaw harsatna a awm apiangin mipui nghawng dawt khawpin thil a kal zel a, mipuiin chhan an ngai takzet a ni.

Mizoram sorkar hian thil thui tak thlirin Mizoram State Transport a neihte pawh a kal zel dan tur ngaihtuah se, hlawkna nei khawpa liana a din a nih loh chuan tihtawp hial emaw, tuna a kal dan ang lo deuha a kal a hun ta. Mizoram pum tuama hlawk tuma a beih tak tak chuan sorkar tan tih theih loh a awm lo a, tuna a kalphungah hi chuan mipui tana rin ngam tak tak si lo, sorkar tana hlawkna nei tam mang si loin a kal a ni ber mai.

Public transport system ṭhatna hi khawpui leh ram nuam a ni zel a, hemi kawngah hian Mizoram hi a la hnufual hle. Tuna sumdawng lirthei nuar hian sorkar leh Aizawl Municipal Corporation-te hi tiharh se, mipui vantlang tana tun aia ṭangkaia chhawr theih tur, man tlawm zawk leh rintlak zawk vantlang mipuite veivahna tur hi duang chhuak thei se a ṭha ngawt mai.