Rêl kawng siamna hmanrua rûkbo

Northeast Frontier Railways General Manager chuan Bairabi leh Sairang inkara rél kawng siam mekah, hmanrua - thîrte miin an rûkbo nasat thu leh an mangan thu May 21, 2024 khan Chief Minister an hrilh a, "Hetiang hi state dangah a thlen ngai kan hre lo. Gas hmangte'n an tan a, bolt te, bearing-te a bo nasa a, motor-te rawn kengin an phur chhuak ṭhin," a ti.

Railways hotupa thil sawi hi a dik ngei a rinawm a, a hma pawhin sawi a lo awm tawh bakah, rél kawng siamnaa thir ṭhenkhat lirthei hmanga rûk tum lai video a lo darh tawh. Railways hotupa hian state dangah a thlen ngai loh thu a sawi zui a; Mizoram, Kristian ramah rûkrûk a tam zawk tlat hi a zahthlak.

Sairang thlenga rél a lo luh theihna tura rél kawng siam a ni hi a lawmawm. A puitlin a, rél a rawn luh hunah chuan Mizoram tan hlâwkna, hmasawnna, awlsamna tam tak a thlen ngei a beiseiawm a, mi tam takin nghâkhlel takin an thlir mek a ni.

Rél kawng siam tibuai thei leh tikhawmuang thei zawnga Mizo zinga che ṭhin an awm hi a zahthlak a, a pawi. Kristian, Pathian nung ringtu, thil dik lo leh ṭha lo ti lo tura ngaih Mizo zingah Kristian ni lote pawhin an tih ngai loh ti an awm tlat leh rél kawng siamtute'n an mangan phah hial hi a zialo tak zet.

Rél kawng siamna atana thîr pawimawh tak tak ru ṭhinte hi vèn sèn a har mai thei. Bungruate chu uluk takin véng pawh ni se, a rûka thil tih a nih miau avangin kawng an zawng hmu zel thei pawhin a rinawm. Chuti chung chuan, rûk a nih tawh loh nan a theih ang anga vèn a ṭha a, rél kawng siamtute leh an mi rawihte mai bakah, Mizoram mipui hian mitmeiin tláng ila awmzia a neih a beiseiawm.

A pawimawh zawk chu rûk duh lohna rilru put a ni. Mi bungraw ṭha lai, an duh lai rûk tum an awm loh chuan vèn miah loh pawhin a bo kher lo ang. Mizo mipui inenfiah a ngei a ni.