Hna thawhna hmuna awm ṭhat loh

24th May, 2024

Mamit MZP hruaitute chuan, chawlhkar tìr Thawhṭanni leh chawlhkar tawp Zirtawpniah Mamita sorkar department hrang hrang pisaah dàwr tur an awm mumal loh thu leh an ngaimawh thu May 22, 2024 khan an sawi a; mipuiin harsatna an tawh phah avangin harsatna sutkian nan hmalak an tum thu an puang.

MZP hruaitute sawi aṭang hian Mamitah sorkar hnathawk, Aizawl leh khaw dang mi eng emaw zat an awm a, chu'ng mite chu an khuaa Pathianni hmang turin Zirtawpniah an haw a, Thawhṭanniah emaw Mamit an pan leh ṭhin a; chuvang chuan Thawhṭanni leh Zirtawpniah an hnathawhna pisaah mipui dàwr theih turin an awm lo ṭhin a nih hmel.

Mamita thil awm dan angin district khawpui dang leh khaw dang ṭhenkhatah pawh a nih a rinawm. Aizawl aṭanga khaw danga sorkar hna thawka awm zingah an veng/khuaa sunday school kai kim theite pawh an awm ṭhin.

Khaw danga hna thawk chunga mahni khua/venga sunday school kai kim hi thil theih loh tawp a ni lo, ṭhenkhat tan chuan a theih ngei ang. Mi tam zawk erawh chuan mahni khuaa haw duh vangin a hun hmain an bàn phah a, pisa an kal tlai phah ngeiin a rinawm.

Mahni kohhrana sunday school kai kim aiin mahni thawhna hmunah sorkarin hna thawh hun (office hour) a siam ṭha taka zawm a, mahni hna ṭha tak thawh a pawimawh zawk. Mizote hi Kristian kan ni deuh vek mai a, khaw danga hnathawk tan pawh inkhawm leh sunday school kai hi chu hna thawhna khuaah pawh a theih tlangpui.

Biak-ina inkhawm ṭhat viau te, Pathian faka lâm te, rawngbawltu pawimawh nihte hi a ṭha. Chu ai mah chuan Pathian ringtu nihna mahni hna thawhna hmuna lantir hi a ṭha lehzual. Office hour-a hnathawhna hmuna awm loh leh mipui tana dàwr theih tura awm loh hi sorkar dan zawm lohna a ni a; Pathian ringtu awm dan tur a ni lo.

Sorkarin hna thawh hun chhung a siam a, chu chu sorkar hnathawkte'n an zawm tur a ni a; hei hi Aizawla thawkte leh a khaw mite tan chauh ni loin, khaw danga hna thawkte pawhin ṭha taka an zawm tur a ni. Sorkar hna hi mipui tana thawh leh rawngbawlna a ni a, office hour-ah chuan mipui dàwr theiha awm ngei tum a ngai e.