Sorkarin Mizorama thar buh lei a tum

Chief Minister, Agriculture Minister leh Food, Civil Supplies & Consumer Affairs Minister-te leh sorkar official-te chuan May 22 khan Mizorama thar buh (buhhûm) lei dan tur an ngaihtuah a; Mizorama thar buh lei dan tur leh a kaihhnawih thilte chipchiar zawka zir chiangtu tur Supply Minister kaihhruai team an din.

Supply Minister sawi danin, Mizoram sorkara buhfai lei leh hralh a kalpui ṭhin dan tihdanglam hlek tum a ni a, an tum anga an kal theih chuan kum tin sorkar sum vbc. 70 vel hum a ni thei dawn. Mizoramah buh herna khawl lian bun a, state páwn aṭangin buhfai lei lo a, a hûm leia Mizorama her tum a nih thute pawh sawi a lo ni tawh.

Buhfai chungchanga sorkar hotute'n hmalak tum dan an sawi hi hlawhtling ta se, Mizoram leh mipui tan thil ṭha zawk leh hlâwk zawk a ni thei a; a lo ṭha lo zawk thei a, a hlâwk lo zawk thei bawk. Hriat lâwk leh sawi lâwk theih a ni rih lo.

Sorkarin Mizorama thar buh lei a tum hi a tihlawhtling thei a nih chuan loneitute tan thil ṭha tak a nih a rinawm. Buh thar tamna deuh leilet hmun ṭhenkhata an tharte chu sorkarin a leisak tawh ṭhina sawi a ni a, tlang ram loa buh thartute erawh chuan an la hralh chhuak vak lo niin a lang. Sorkarin mipuia sem tur buhhûm a lei thei a nih chuan tlang rama loneitute pawhin an hlâwkpui ngeiin a rinawm.

Mizoramin buhfai a mamawh zawng zawng state dang aṭanga lei vek lo a, Mizorama thar buhhûm lei tel hi a hlâwk zawk a nih chuan a ṭha hle dawn. Sum leh paiah a hlâwk zawk bik lo emaw, a hlâwk lo zawk mah emaw a nih pawhin, chaw kan rin pui ber buhfaia intodelhna lam hawi a ni a, a ṭhat zawkna a awm tho thei ang.

Mizorama thar buh lei chungchanga sorkarin ruahmanna a siam hi zûzî loin, hlawhtling ngei thei se, chutiang tur chuan chak takin bawhzui rawh se. Mizorama sorkar mek hotute'n kut hnathawktute lam hawi an nih thu an sawi ṭhin hi a hlawhtlin thuai theih nan chak taka bawhzuiin ṭan la ngei teh se.